Senin, 20 Oktober 2008

USUL ADAT TARUHON JUAL


01. Na ro do Rombongan ni Parboru rap dohot sude Sisolhotna dohot Boru Muli tu huta ni Paranak.

Asa mulak tu dasar ni ADAT Ulaon Taruhon Jual ni-usulhon do songon on pelaksanaanna:
Molo tar dao do Huta ni Parboru tu Huta ni Paranak, paradeon ni Paranak ma Jabu parbornginan di nasida. Molo adong do Jabu ni Dongan Sabutuha ni Parboru di hutai, tarjumolo doi dihubungi Parboru asa adong inganan haborhatan nasida di hutai.

02. Di-mata ni ulaoni, manogotnai migor do ditaruhon Paranak Sipanganon tu inganan parbornginan ni Parborui Sipanganon marlompan Juhut ima nadigoari Daon Pogu manang hata nuaeng: Sarapan Pagi. Ndang pola rombongan laho manaruhon sipanganoni, sae ma sahalak sian Dongan Sabutuha ni Paranaki nabertugas pasahathon hata ni sipanganoni tu Parboru, anggo namamboan sipanganoni angka Boru ni Paranak ma.

03. Dung sahat di tingkina laho borhat tu Gareja (ulaon Pamasu-masuon) ro ma rombongan ni Paranak rap dohot Anak Mangoli tu bagas Parbornginan ni Parboru jala ma rade Parboru dohot Boru Muli manjalo haroro ni Paranaki. Songon ulaon namarsibuha-buhai alai ndang manghunti Ampang be. Martangiang ma Parboru, tangiang laho borhat tu Gareja jala rap udur ma Paranak dohot Parboru mangundurhon Penganteni.

04. Tangkas do taantusi ia Adat Pamuli Boru Taruhon Jual manang didok doi RAMBU PINUDUN, namarlapatan doi sude: Inganan, Sipanganon, dohot sude haporluan ni Pestai gabe tanggung jawab ni Paranak. Ia Parboru holan mamboan Dengke Simudur-udur dohot Ulos Herbang sipasahaton tu Paranaki

05. Di Inganan Parpestaan: Dung mulak sian Gareja, jala sahat tu inganan parpestaani parjolo ma masuk Penganten dohot Rombongan Suhut Paranak alai anggo Suhut Parboru dohot sude rombonganna/naniontangna ndang dohot dope masuk tu bagas. Dung sude simpan parhundul ni Hasuhuton Paranak dohot angka naniontang nasida, parjolo ma Paranak manggora : Hula-Hula, Tulang, Tulang Rorobot, Bona Tulang, Bona ni Ari, Hula-Hula na-Marhaha-maranggi dohot Hula-Hula ni Anak Manjae masuk tu bagas jala jaloon ni Suhut Paranak ma sude Hula-Hulai dohot tortor.

06. Dung simpan masuk jala hundul sude hula-hula ni Paranak, bersiap ma Suhut Paranak laho manjalo haroro ni Rombongan ni Suhut Parboru. Rap masuk ma Suhut Parboru, Hula-Hula, Tulang, Tulang Rorobot, Bona Tulang, Bona ni Ari, Hula-Hula Namarhaha-maranggi, Hula-Hula ni Anak Manjae ni Parboru, ihut ma muse angka sisolhot naniontang ni Parboru masuk tu bagas dung manggora Paranak. Jadi sahali masuk do sude. Sude nabinoan ni Suhut Parboru dohot Rombongani, Dengke Siuk dohot Boras si Pir ni Tondi dipasahat ma tu Paranak alai anggo Dengke sipasahaton ni Suhut Parboru dipasimpan ma jolo diinganan na denggan paima tingki laho pasahathon.

07. Di Jakarta nataulahon di Pesta Adat Pamuli Boru Taruhon Jual gabe songon ulaon Alap Jual do: Adong do namarsibuhabuhai, dungi di Gedung adong Hak ni Parboru manggora Hula-Hulana asa masuk tu Gedung jala Suhut Parboru muse namanjalo sude nabinoan ni Hula-Hulana.


Pertanyaannya : Beha do pandapotmuna angka Dongan: Taulahon ma torus sisongoni manang taihuthon ma songon dia aslina......??????????

Selasa, 07 Oktober 2008

GURU MANGALOKSA



GURU MANGALOKSA: Mangingani Ujung Sinomba na nuaeng digoari Rura Silindung
Margoar : Si Opat Pusoran ai opat pusoranna di uluna.
Anak na : si Raja Nabarat = Hutabarat
Si Raja Panggabea = Panggabean
Si Raja Hutagalung = Hutagalung
Si Raja Huta Toruan = Huta Toruan

Tibu do Gabe Pomparan ni si Opat Pusoran , ndang tuk be Boru napulik Marga naeng olion ni anak nasida. Sai marbadai jala marmusu do dompak Toga Sipoholon ala ni parbalohan, gabe ndang adong na barani laho tusi martandang. Molo adong nabarani laho ma martandang dompak huta ni Pohan manang tu Toba., alai jotjot do nasida dibeanghon halak jala ingkon ditobus.

Ala ni i mardos ni roha ma nasida na opat Marga asa marsumbang = masiolian, Tangkas do parsumbangan ni Marga na opati disurathon Guru Sinangga Diaji, di Pustaha, jala tarsimpan do I di Museum na di Leiden, Negeri belanda jala adong do copyna di Museum na di Jakarta.

Rata pe bulung ni salak, rataan do bulung sitorop
Uli pe hata ni sahalak, ulian do hata ni natorop
Hata mamunjung hata lalaen, hata torop sabungan ni hata.

Hula-Hula: Hula-Hula Bona ni Ari, tinongos ni Ompunta Mulajadi
Sisubuton marulak loni, sisombaon di rim ni tahi

Hula-Hula mata ni ari binsar, sipanumpak do tondina
Sipanuai ia sahalana, di nasa pomparanna.

Obuk do jambulan, na nidandan baen samara
Pasupasu ni hula-hula, pitu sundut soada mara

Dongan Sabutuha/samarga : Hodong do pahu, holiholi sangkalia
Ho do ahu, hita na marsaina

Tali papaut, tali panggongan
Nang pe taripar laut, tinanda do rupa ni dongan

Boru : Siporsan na dokdok, sialap na dao
Na so mabiar di ari golap, siboan indahan na so bari, siboan tuak na so asom.

Gu ni lombu, tabo ginambirian, sai gabe boru asa adong panailian
Suhat sigopuk, suhat ni panggabean, molo mamora boru, adong ma paulaean.
Ai during do boru, tamburan hula-hula, molo mamora boru, birsak ma tu hulahula

Tinallik randorung, sai bontar gotana,
Dos do anak dohot boru, nang pe pulik margana

Ia tungkap marmeme anak, tungkap marmeme boru

LAPATANNA UMBAHEN SADA PUNGGUAN


PUNGUAN NI SADA-SADA MARGA DI BANGSO BATAK dung Kemerdekaan ni Bangso Indonesia

Dung di proklamirhon kemerdekaan ni Bangso Indonesia di tanggal 17 Agustus 1945 mansai las situtu do roha ni Bangso Batak jala marsitutu mangalehon roha, pikiran, gogo laho manungkolnungkoli kemerdekaan i marhite hasadaon laho mangalele bangso penjajahi sian tano Batak khususna dohot sian sude tano ni Bangso Indonesia pada umumna. Ndang marnamimbar, sude do parsidohot, marhite na langsung dohot tu porang mangalo penjajah, marhite pingkiran dohot sibahenon mangurupi perjuangani songoni marhite angka sibahenon naasing pen a boi manungkoli kemerdekaani.

Tarida do I antong sian ende natarbege ditingki i: Di Tapanuli Pemuda siap berbakti Tanda setia Tanha Air sejati Semangat disinari, Daulat Raja Batak yang sakti Di Medan perang memberi bakti patut mencabut pedang jenawi. Semangat Batak, Semangat Garang Berpantang pulang sebelum kita menang Penjajahan ditentang, maju kita berperang Tanda setia, kepada Negara siap sedia mengorbankan jiwa Dibawah pimpinan Soekarno yang mulia Hiduplah Indonesia Merdeka.

Marhite porang kemerdekaani, lam tarbarita ma habaranion dohot parsidohot ni Bangso Batak merebut kemedekaani, di Tano Batak sandiri, Medan Area-Tembung, Bandung Lautan Api, angka na rap dohot Presiden Soekarno ditingki i, gabe balga situtu ma roha ni Bangso Batak natading di huta, tarbuka ma roha dohot pikiranna, jala ganup ripe marsinta-sinta tu hamajuon ni ankhonna.

Dung denggan sude mardalan pamarentahan ni Bangso Indonesia, sada do natubu di pongkiran ni Halak batak i ma: Pasingkolahon Anakhonna.: dipardukhet-dukheti Halak Batak ma sian sude gogona asa boi pasingkolahon anakhonna tu na lobi timbo, jala dimulanana di Kabupaten paling timbo ma sahat tu tingkat SMP, molo tu tingkat SMA ingkon dipaborhat ma tu huta naung adong SMA jala molo di namaradong dipaborhat ma anakhonna dung tammat SMP manguduti tu Pulo Jawa. Ala di mulanai ndang adong dope di Sumatera tingkat Universitas, dung tammat anakhonna sian SMA diusahahon ma asa diuduti anakhonna marsingkola di Universitas na adong di Jawa.

Disamping ni angka anakhon parsingkola, godang ma muse anakhon ni Halak Batak na borhat mangaranto laho manguduti ngolu marhite namandiori parkarejoan di Pulo Jawa, dohot Kalimantan.

Dipasu-pasu jala diramoti Debata do parserahan ni Bangso Batak i. Boi dohonon tung sude do Halak Batak na haruar sian Tano Batak dapot ngolu-ngolu songoni nang di hagabeon marhite di parsaripeon nasida dung dapotsa ngolu-ngoluna, jala siala ni i lam godang ma Pomparan ni Marga Batak mian di tano sileban.

Dung lam godang sada-sada Marga di sada luat, godang ma nang angka sipatupaon di angka paradaton ditonga-tonga ni parsaripeon ni Halak Batak, Adat di Pardongan Saripeon, Adat di tingki adong na monding, tubu ma pingkiran ni sada-sada Marga mambahen Parpunguan.

Dimulanai di tano pangarantoan on, ala sipata ndang haru godang dope sasa-Marga, dipatupa ma Pungun di nasida Punguan ni na-sangkambona, ibaratna manang piga-piga ompu naung masihunti Margana, Goar ni Punguan nasida dibuat ma sian ginjang. (songon contoh: Punguan Pomparan ni si Opat Pisoran; di si ma Pomparan ni Raja Nabarat, Raja Panggabean, Raja Hutagalung dohot Raja Hutatoruan).

Jala lam tu dengganna angka parsaorani, marture ma angka punguan di sada-sada Marga jala dibahen ma goarna : PUNGUAN POMPARAN NI SI RAJA ……… (Marga) DOHOT BORUNA SE…………(Huta)


AHA DO LAPATNANNA UMBAHEN DIPATUPA SADA PUNGUAN ??

PUNGUAN marlapatan do i : papunguhon asa sada inganan
PUNGUAN PARMARGAON : marlapatan do i papunguhon sada-sada haturunan/Marga nasangkambona Jala dimulanai, maksud dohot tujuan ni Punguan ima asa sisada tahi sisada gogo/masitungkol-tungkolan dinalaho mangulahon par-Adaton ditonga-tonga ni Marga nasida .

(di kemajuan ni teknologi dari-ari naparpudi adong ma sian punguan ni Marga namanambai ulaon ni punguani songon namambahen Yayasan manang Arisan d.n.a.)

Aha do Ulaon ni Pangurus ni Punguan: I ma sipature narundut, sipatio nalitok, sipadirgak naunduk, sipajongjong nagale, masiurupan, dibagasan holong ni roha, manogu-nogu ruas asa sude mardomu dibagasan hasadaon disude angka ulaon tu hadengganon.

Siala ulaon sisongon nanidok di ginjang i, ulaon naborat do ulaon ni pangurus ni punguan, ingkonlehononna rohana, gogona, tingkina, di kehidupan sosial ni ruas ni punguani, parbahul-bahul nabolon, sisada roha dohot pardijabuna, Khusus jala tersendiri do anggo Punguan Par-Margaon, nang pe adong dipatupa Anggaran Dasar dohot Anggaran Rumah Tangga songon kelengkapan ni Punguan alai ndang identik Punguan Parmargaon dohot

Punguan manang Organisasi naadong di Masyarakat.




Rabu, 24 September 2008

TARINGOT TO NAMONDING

Mansai godang do siidaon namasa di parmonding ni naung hot ripe, ima diangka ulaon siulahonon ni angka dongan tubu, boru dohot hula-hula ni na mondingi.
Nian, nunga ulaon di arsak ni roha, ai marsak ma antong na mateani dohot sisolhotna ala namonding sahalak nanihaholongan ni roha nasida. Hape, ala ni angka ulaon Adat na sipatupaon di parmonding ni Ama manang Ina jotjot do timbul salah paham mardomu tu Adat hasomalan ni angka nasasa-Ompu (Suhut dina mondingi) dohot Adat hasomalan ni Hula-Hula ni namondingi.

Adong nahuadopi Paradaton di namonding songon on:

Monding ma Ama – Simatuana/Hula-Hulana ma na pasahat Ulos Saput dohot Ulos Tujung: (didok ditingki namonding sada Ama di nasida Marga …..Par Balige) nahinabaluhon ni Ina tubu ni dongan par-Silindung, jadi ditingki martonggo Raja (mangarapot istilahna di Jakarta on) didok Suhut di Namondingi ma na Simatua (Hula-Hula) ni namondingi sibahen Saput dohot Tujung.

Monding ma Ina tubu ni dongan Par-Silindung, nahinabaluhon ni Ama sian Humbang topi tao, didok : Simatuana (Hula-Hula) ni Ama namabalui ma mambahen Saput jala Tulangna mambahen Tujung: Molo monding sahalak Ama di nasida Tulang ni namonding mambahen Saput alai anggo namambahen Ulos Tujung tu Ina namabalui ima Simatua /Hula-Hula ni na mondingi.

Molo di Silindung songon naung somal niida dohot niulahon molo monding Ina manang Ama ba Tulangna do sibahen Saput jala Hula-Hulana sibahen Tujung.

Unduk marmeme Anak unduk do marmeme Boru: ido pandohan ni Ompunta sijolojolo tubu, jala songoni do nang di parsorang ni dakdanak di Pamoruon, dakdanak baoa manang dakdanak Boru-boru migor do ro Hula-Hulana (Tulangna) mamboan Aek ni Unte dohot pasahat Ulos tu dakdanak nabaru sorangi jala didok ma Ulos Parompa.

Mangoli Anak Baoa manang Muli Borui ba Tulangna do napasahat Ulos, jala didok ma nuaeng goar ni Ulosi Ulos Holong.

Monding pe Bere Baoa manang Bere Boru-Boru Tulangna ma napasahat Ulos Saput. Ima Ulos parpudi tu Berena namondingi.

Di sude ulaon las ni roha, tongtong do tapasangap Tulang ni Ina na tadok panjouon tu nasida : Tulang Rorobot (Tulang Narobot) namarlapatan sipasahat Ulos ma nasida tu Ina di na robot (molo monding)

Songoni do nang di Na-MANGOMPOI JABU NAIMBARU” Tulang ni Amai do naberperan anggo napasahat Ulos Herbang, baru pe diuduti dohot Ulos Herbang sian Hula-Hulana. (sitaringotanta muse dipudi ima taringot tu ULAON MANGOMPOI JABU, Jala ido dasarna molo mompo namonding tu jabu-jabuna (batangna) Tulangna do namenyaksihon laos napasahathon Ulos Saput tu namompoi (namondingi). Diuduti ma muse dohot Hula-Hulana napasahat Ulos Tujung tu namabalui.

Molo tung pe adong angka pangulaon di napasahat Ulos Saput dohot Ulos Tujung namarasing-asing sian nasomal niulahon, denggan ma Hasuhuton ni na mondingi masipasangapan dohot horong ni Hula-Hulana asa mardalan ulaoni dohot denggan.

TARINGOT TU NAMONDING:

01. Monding Baoa manang Boru-boru naung hot ripe alai ndang mardakdanak dope.
02. Monding Ama/Ina naung adong anakhonna (dakdanak/posoposo dope)
03. Monding Ama/Ina alai ndang adong dope naung hot ripe anakhonna
04. Monding Ama/Ina naung adong anakhonna hot ripe alai ndang marpahompu dope
05. Monding Ama/Ina naung ganjang umurna lobi 70 taon alai ndang mardakdanak (punu)
06. Monding Ama/Ina naung marpahompu alai adong dope anakhonna dakdanak
07. Monding Ama/Ina naung hot ripe sude anakhonna alai ndang marpahompu dope.
08. Monding Ama/Ina naung marpahompu sian Boruna alai ndang marpahompu dope sian anakna
09. Monding Ama/Ina naung marpahompu sian Anak dohot sian Boru alai adong dope anakhonna na so hot ripe.
10. Monding Ama/Ina naung marpahompu sian sude anakhonna alai holan sian Boruna
11. Monding Ama/Ina naung marpahompu sian Anak dohot sian Boru (sude ma hot ripe)
Di tingki na parpudi on mardomu tu Program Keluarga Berencana mungkin godang ma na monding Saur Matua alai anggo umurna poso dope ala ma marpahompu sian Anak dohot sian Boru ai holan dua do anakhonna (sada anak sada boru)
12. Monding Ama ndang adong dope na hot ripe anakhonna alai monding ina namabalui dung
marpahompu sian anak dohot sian boruna (sude anakhonna ma hot ripe)
13. Monding Ama/Ina naung marpahompu anakhonna (marnini manang marnono)
14. Monding Ama/Ina naung marnini-marnono, sahat tu mungkin namarondokhondok.

Godang dope nian ragam ni na monding diluar ni naung ni dok diginjangi, alai ndang sudenai nanaeng si taringotan di Buku on.

ULAON DI NA MONDING NAUNG HOT RIPE

01. MONDING Baoa manang Boruboru naung hot ripe alai ndang mardakdanak dope.

Mardalan do dison ulaon napasahat Ulos Saput dohot Ulos Tujung.
Jala panimpuli ni ulaon songon on:
Molo monding Ina, Simatua ni namabalui ma pasahat Ulos Tujung tu Helana jala dipasidung ma namangungkap Tujung dung mulak sian udean.
Molo monding Ama dipasahat hula-hula ni namondingi ma Ulos Tujung tu Ina namabalui Ditingki di jabu dope bangkei, manghatai ma Parboru tu Natoras ni Ama naung mondingi manungkun taringot tu Boruna naung mabalui.
Parboru : Beha do Lae nang hamu Ito, taringot ni Parumaenmu naung mabalu on, adong dope rohamu manahani ibana asa tinggal rap dohot hamu. (maksudna: atik adong anggi ni namondingi naeng patohoon ni Paranak dope tu Boru namabalui)
Paranak : Mauliate ma Tunggane nang di Inangbao, anggo taringot di parumaennami nang pe naung mabalu nasida alai tinggal ma rap dohot hami, alai targantung di nasida do ba rap manungkun ma hita, dia ma dohononnami ai ma songoni jolo huroha nasibnami.

Parumaen: Pangidoanhu nian naeng ma ahu rap dohot Simatuanghu, alai beha pandok nasida ba sipangoloi do ahu disi.
Molo dos do roha ni Paranak dohot Parboru dohot Parumaen/Boru namabalui, laos diungkap di Udean do Tujung ni Borunai, laos ihut ma dohot mulak tu jabu ni Parboru.
Alai, jotjotan dung manang piga ari/minggu dung mabalu, ala dos ni tahi dialap Parboru ma Boruna sian bagas ni Paranak.
Ala ndang sai binoto, atik naung adong di bortian ni Boru namabalui, biasana sahat tu sataon dung mabalu ndang boi namabalui marhamulian.

02. MONDING AMA manang INA (No.02 & 03) (Mate Mangkar)

Mardalan do dison napasahat Ulos Saput dohot Ulos Tujung, songoni nang Ulaon Ungkap Tujung dung mulak sian Udean.
Holan ulaon saripe do on antara Hula-Hula dohot Pamoruonna.
Jadi molo monding Ama manang Ina na so adong dope anakhonna naung hot ripe, sude do na mondingi didok Mate makkar.
Molo Ama na monding didok ma nama- Ponggol Ulu
Molo Ina na monding didok ma Matompas Tataring

03. Monding Ama/Ina naung adong anakhonna hot ripe alai ndang marpahompu dope

Di na monding songon napinatorang (03) diginjangi, mardalan do ulaon na pasahat Ulos Saput, dohot Ulos Tujung songoni ma nang ulos holong sian angka Simatua ni anakna, jala dung mulak sian udean dipatupa do ulaon partangiangan goarna.
Lapatanna, mangido do Hasuhuton ni namondingi asa dung mulak sian udean asa mulak muse tu jabu laho mangido tangiang dohot angka poda sian nasida tu angka anakhon ni naung mondingi.
Ulaon partangiangani dipasada ma dohot ulaon na mangungkap tujung.
Ndang adong pola manggora parbagi ni parjambaran di ulaon partangiangan sisongon on.

Alai tutu, ndang na gabe keharusan ulaoni ingkon songoni, ai adong do napatimbohon ulaoni gabe tu ulaon SARI MATUA., tergantung do i tu angka sisolhotna namangidohon pangidoan nasida tu Dongan Tubu, Dongan Sahuta tarlobi tu horong ni Hula-Hula ditingki Tonggo Raja/Pangarapoton.
Molo dos do tahi ditingki pangarapotoni saut ma sangkap nasida taringot tu ulaon i.
Jadi di Tonggo Raja/Pangarapoton do sude puncak ni nanaeng siulahononhon ditingki adong na monding Ama manang Ina.

Jadi songon dia ma keputusan ni Hasuhuton, Dongan Tubuna, Dongan Sahutana, tarlobi Tulangna dohot Hula-Hulana di tingki pangarapoton/tonggo rajai, laos songoni ma diulahon ditingki napatupa ulaon di na monding Ama manang Ina.

ULAON DI NA MONDING NAUNG HOT RIPE (udutna) TARMASUK DO PANGIDOAN SISONGON ON { ULAON SARI MATUA)

Monding Baoa/Boruboru naung marumur lobi sian 70 taon alai ndang maranakhon (05)
Monding Ama/Ina naung marumur lobi sian 70 taon alai ndang marpahompu dope (05A)

Na berperan di ulaon sisongon on khusus tu No.: 05 ima angka pomparan ni Haha-Anggina na saAma manang na sa-Ompung (ndang sa-Ompu nanidok disi).

Molo tu No.: 05A pangidoan ni anak ni namondingi ma jolo tu Dongan Tubuna, asa adong mandat ni Dongan Tubu laho manghatahon di Tonggo Raja.

Denggan pe maksud ni Dongan Sabutuha dohot Dongan Tubu anggo keputusan tong do di Suhut na marsitaononi. Ai pitu batu martindi tong do sada/hasuhutoni sitaon nadokdok..

Angka alasan di napatimbohon derajat ni Adat di parmonding ni sahalak natua-tua (Ama/Ina) ima :
Ripe na sai tongtong mangihut-ihut Ulaon Paradaton saleleng di ngoluna pola gabe panungkunan di Adat dohot Ugari.
Ripe, panungkunan bisuk, pangalapan roha, sipatiur narundut, sipadame napagulut, Nadompak Pujion, Natundal hataon, parhata saut, parhata oloan.

Angka Ripe namarpangalaho sisongoni ma, jotjotan dipatimbo dongan partubuna Adatna diparmondingna, gabe Ulaon Sari Matua manang Ulaon Saur matua.
Alai sai olo ma hita mangulahon napatut ulahononhon di parmonding ni Ama manang Ina jala unanag ma tapaksahon ala ni sinadongan manang pangkat unang gabe sihataon ni dongan hita dipudian ni ari.

ULAON DI NA MONDING SARIMATUA

Na didok Monding SARIMATUA ima:
a. molo monding Ama manang Ina naung marpahompu sian Anak marpahompu sian
Boru alai adong dope anakhonna na so hot ripe (09)
b. Monding Ama/Ina naung marpahompu sian Anakna alai ndang dope sian Boruna jala
ma sude anakhonna hot ripe.
c. dohot natinaringotan diginjangi.

Ia ULAON SARI MATUA molo monding sahalak natua-tua sipatupaon ni Hasuhuton ma Ulaon paborhathon (ulaon borhat borhat) jala tudu-tudu ni sipanganon di ulaon Sarimatua ima: Namarmiakmiak/Lombu natinutungan manang Lombu tunggal, margantung tu kondisi ni na mondingi di paranakhonon

Molo di Bona Pasogit biasana jolo mulak sian udean do dipamasa namarsipanganon dohot namarbagi parjambaran dohot angka ulaon nahombar tu Ulaon Sari Matua/Saur Matua.
Alai anggo di Jakarta on ala ni sompit ni tingki di angka sisolhot nunga sering dipatupa ulaoni dinalaho paborhathon bangke tu udean.
Dung mulak sian udean, holan Hasuhuton nasolhot nama namulak tu jabui dohot Hula-Hula, dohot Tulang laho pasidung ulaon paradaton.
Di Ulaon on sahat dope Ulos Tujung, dohot ulaon ungkap Tujung.

ULAON SAUR MATUA

Nadidok Monding SAUR MATUA, ima parmonding ni natua-tua naung hot ripe sude anakhonna, marpahompu di Anak, marpahompu di Boru, ra deba nunga sahat tu namarnini – marnono.
Sipatupaon di ulaon Saur Matua ima Horbo Sitingko Tanduk, manang Gajah Toba lapatanna dia ma Horbo na umbalga
Ulos sipasahaton di ulaon saur matua ndang didok be Ulos Tujung alai digoari ma : ULOS SAMPE TUA.

SI ULAON DI PARMONDING NI NATUA-TUA (ULAON SARIMATUA)

01. MANGARAPOT/MARTONGGO RAJA
Di sude ulaon sipatupaon di namonding sahalak natua-tua, ingkon jolo patupaon do ulaon pangarapoton, ima biasana di borngin parpudi andorang so paborhathon tu udean.

Molo monding sahalak natua-tua denggan ma hasuhutoni marhobas laho paboahon baritai tu Tulang, Hula-Hula, Tulang Rorobot ni na mondingi jala molo di Ulaon Sari Matua, sahat ma tu Hula-Hula ni na Marhaha-Maranggi, Hula-Hula ni Anak Manjae jala denggan ma sahat nang tu Bona Tulang, Tulang rorobot sahat tu Bona ni Ari.

Molo di Ulaon Saur Matua denggan ma jolo martonggo Raja (NA SAULAON) di sasa Marga asa sisada tahi sisada roha dohot pingkiran, sisada gogo di nalaho mangulahon ulaoni dohot dinamangadopi Tonggo Raja dohot horong ni Hula-Hula.

Di sude namargoar Tonggo Raja unang lupa manggokkon Dongan Sahuta dohot Ale-Ale ala didok do: Jonok partubu jonohan do parhundul, ai dongan sahuta do tampuk ni sude ulaon di hutai.

Di Ulaon Tonggo Raja/Mangarapot di Ulaon Sari Matua dohot Ulaon Saur Matua, naeng ma di parade Sipanganon namartudutudu (namarmiak-miak) alai anggo tonggo raja di angka na mate mangkar dohot nasajajar dohoti sae ma holan sipanganon biasa.

02. Tingki Pangarapoton/Tonggo Raja:
Molo dung ma diida Protokol naung sahat angka Hula-Hula, Tulang dohot angka Dongan Tubu, disuru ma Boru laho paturehon hundulan namasiadopan.

PROTOKOL:
aa. Dihita na Mardongan Tubu Pomparan ni Ompunta si Raja Hutagalung, Borunami dohot Berenami, Dongan Sahuta dohot Ale-Ale, ala naeng pungkaonta ma Ulaon Mangarapot/Tonggo Raja rap dohot Hula-Hula dohot Tulangta, ro ma hita tu inganan naung pinarade di hita dison asa sada hita laho mangadopi horong ni hula-hulanta.

bb. Dihamu Borunami, parade hamu hian ma angka naporlu dohot sipatupaon di ulaon tonggo raja on. (buku, papan tulis, dohot sipanganon daon pogu)

03. Tingki Pangarapoton/Tonggo Raja (udutna)
Protokol:
cc. Di hamu Rajanami nahuparsangapi hami, Hula-Hulanami (didok margana jala unang lupa manambai hata Raja dijolo ni Marga), Tulangnami, Tulang Rorobotnami, Bona Tulangnami, Bona ni Arinami, Hula-Hula ni namarhaha-maranggi dohot hula-hula ni Anak manjae.
Mahuparade hami inganan di hamu Rajanami dina laho pungkaonta ulaon Pangarapoton. Ro ma hamu Rajanami asa tapungka ulaonta.

Dung pungu sude:
dd. Parjolo: jolo disise Protokol ma manang naung sahat sude Hula-Hulai, dipatangkas ma marga nasida, tutur, mamungka sian hula-hula.
Songoni di namardongan tubu, dohot dongan sahuta.
Molo dung pungu sude disi, parjolo manungkun ma Protokol:
= Di hamu Rajanami, andorang so tapungka panghataionta, paboaonnami do Rajanami, adong do huparade hami sipanganon di ulaon tonggo raja on, namanungkun ma hami: Jolo marsipanganon ma hita Rajanami asa manghatai ?? (biasana jolo marrapot ma.)

Di tonggo Raja ni na Mardongan Tubu nunga ditontuhon hian: ise ma Panghatai, ise sijaha Riwayat Keluarga (Jujur Barita), ise Parhobas.

dd.1. Mandok hata huhuasi/hata mauliate di haroro ni angka tondong namandohoti ulaoni
dd.2. Manjaha Riwayat Keluarga (Jujur Barita)
dd.3. PARHATA: Songoni ma Rajanami, nunga rap hita umbege Riwayat Keluarga ni Ama/Ina namonding on jala dibagasanni Rajanami mangido hami di paniroionmuna di sangkap manang Rencana ni Ulaon nanaeng sipatupaonta di nalaho paborhathon Bangke ni Amanta/Inanta natahaholongion tu ingananna parpudi di portibion, marsogot jala Rencananami i tarsongon on ma Rajanami:

dd.3.1. Parjolo: Songon Jujur Barita naung rap hita umbegesa, Ulaon dinalaho paborhathon Ama/Ina natahaholongion naeng patupaonnami ma nian:
ULAON SARIMATUA
Taringot disi ma jolo parjolo Rajanami hupangido hami paniroionmuna Hula-Hulanami dohot Tulangnami, baru pe asa tauduti annon di angka ulaon namangihut dohot angka sipatupaon.
Hupasahat hami ma tu hamu hula-hulanami Raja …….. hamu ma namangatur panghataion Rajanami.

dd.3.2. HULA-HULA : (dung di sise angka donganna sahundulan horong hula-hula)
Mauliate ma di hamu Pamoruonnami, las situtu rohanami dipangidoanmu di
Ulaon sipatupaonta dinapaborhathon Lae/Amangborunami – Iboto/Namborunami on tu ingananna parpudi di portibion ima Ulaon Sarimatua.
Sian hami hula-hulamuna panolopi ma hami di sangkapmunai, alai … ala dison do dongannami sahundulan, Tulang dst. …. Ba hupasahat hami ma jolo tu nasida asa sada alusnami di pangidoanmunai.
Dipasahat ma sungkun-sungkun (martingkat) mulai sian Tulang dst.
Sude do horong hula-hula dohot Tulang mambahen alusna jala molo dung hibul alus sian nasida didok hula-hula ma:

dd.3.2 HULA-HULA (udutna)
Di hamu Pamoruonnami, nunga dibege hamu, sude do hami manolopi pangidoan dohot sangkapmuna di Ulaon Sarimatua dinapaborhathon …………
Horas ma jala Gabe. Hupasahat hami ma tu hamu, lanjuthon hamu ma………

PARHATA: Mauliate ma di hamu Rajanami, sude ma hamu naung hupandok hami di pangoloionmunai di pangidoannami.

Nuaeng hupatorus hami ma jolo manaringoti rencananami di angka Ulaon dohot sipatupaon di ulaonta marsogot:
01. Taringot tu Boa-boaanna (BOANNA) patupasonnami ma Rajanami ima NAMARMIAKMIAK–LOMBUNATINUTUNGAN jala ULAON PARTANGIANGAN ma patupaon dung mulak sian Udean., laos ditingki ulaoni ma nian tapatupa Ulaon Ungkap Tujung

02. Taringot tu na pasahat Ulos Rajanami tar songon on ma konsepnami:
ULOS SAPUT sian Tulangnami Raja …………….(molo Ama namonding)
Sian Tulang Rorobot Raja……….. (molo Ina namonding)
ULOS TUJUNG sian Hula-Hulanami Raja ………
ULOS HOLONG sian Bona Tulang, Bona ni Ari dohot sude Hula-Hula
Ulaoni pungkaonta ma marsogot ari …..tgl…… diparnangkok ni mata ni ari jala songon on ma panjalonami Rajanami:
Parjolo ma jaloonnami Tulang napasahat Ulos Saput
Dungi jaloonami ma Hula-Hula napasahat Ulos Tujung
Molo dung sidung napasahat Ulos Saput dohot Ulos Tujung, mangido hami Rajanami di hamu horong ni Hula-Hula dohot Tulang ala marningot tu tingki hita, nanaeng pasahat Ulos Holong asa mangida tu naparjolo sahat ma.

03. Taringot di Ulaon Partangiangan pangidoannami Rajanami patupaonta ma
nian dung mulak sian udean, dinamangido hami di tangiangmuna dohot angka hata poda tu pomparan ni Ama/Ina namonding on, jala laos di ulaoni ma nian alusannami hamu Rajanami.

Songoni ma konsep di Rencana ni Ulaon Sari Matua nanaeng sipatupaonta Rajanami jala andorang so hupasahat hami pangidoannami tu hamu horong ni Hula-Hulanami parjolo ma jolo hupasahat hami taringot tu ulaon on tu Dongan Sahutanami.

Alus sian Dongan Sahuta : Horas jala Gabe songon dia nasinagkapanmuna Hasuhuton, sian hami Dongan Sahutamuna mandok: Sahata ma hita Rajanami.

Nuaeng, hupasahat hami ma tu hamu Hula-Hulanami dohot Tulangnami:

Dung masisisean angka horong hula-hula dohot Tulang jala ma sada tahi nasida dialusi ma:

Alus Parjolo: Hutolopi hami ma rencanamunai di Ulaon Sarimatua nanaeng sipatupaonta marsogot alai taringot tu panjaloonmu di haroronami asa taatur ma nian tingkina.
(diatur ma tingkina : Pukul:...mamungka sian haroro ni Tulang – Hula-Hula dst.)

dd.3.2. Hula-Hula (udutna)

Alus napaduahon:
Taringot tu Renacanamunai, alus sian hami horong ni Hula-Hula dohot Tulang manolopi ma hami disi, jala atur hma tingki panjalomuna di haroronami.
ALAI PANGIDOANNAMI taringot tu Ulaon Partangiangani dohononnami ma songon on:
Marningot tu tingki namansai porlu dihita na di pangarantoan on, molo boi nian unang pola dung mulak sian udean tapatupa ulaoni alai tapatupa ma ditingki laho paborhathon (dung di alaman batang ni namondingi) jala dung simpul marsipanganon, laos dibagi ma parjambaran, taringot di namandok hata apul-apul dohot poda ai na ro dope hami diangka tingkkina muse.

Biasana molo di Jakarta, alus napaduahoni do dilaksanahon ima tingki di na laho paborhathon laos disi ma marsipanganon Boan dohot namarbagi parjambaran. Dung sidung marsipanganon, mandok hata di alaman nama panimpulina.

PARHATA: (dung masisungkunan na Mardongan Tubu dohot Boru, Dongan Sahuta dapot ma keputusan mangoloi pangidoan ni Hula-Hula diulaon napaduahoni ma dipatupa.

Antong Rajanami, huoloi hami ma pangidoanmunai jala songon on ma hata dohot pangidoannami di acara:

01. Anggo Hula-Hula dohot Tulangnami dung mulak sian udean panakkohonnami dope hamu Rajanami tu jabu laho pasidunghon ulaon Ungkap Tujung (ulaon sadari) laos ditingki ulaoni ma hami mangalusi hamu.

02. Di Bona Tulang, Bona ni Ari songoni nang Hula-Hula Naposo alusannami ma nasida diharoro nasida dung dipasahat nasida Ulos Holong.

Dung simpul Pangarapoton, mangido ma Parhata asa dung sidung marsipanganon asa laos diuduti ma dohot ulaon pamasuk namondingi (mompo) tu jabu-jabuna.
Mandok hata mauliate ma horong hasuhuton, jala ditutup hula-hula ma dohot tangiang
Dipeakhon ma tudu-tudu ni sipanganon diatas ni meja, dihatahon ma huhut diputar:.
Martangiang laho marsipanganon.

04. MANGARAPOT/MARTONGGO RAJA
Di sude ulaon sipatupaon di namonding sahalak natua-tua, ingkon jolo patupaon do ulaon pangarapoton, ima biasana di borngin parpudi andorang so paborhathon tu udean.

Molo monding sahalak natua-tua denggan ma hasuhutoni marhobas laho paboahon baritai tu Tulang, Hula-Hula, Tulang Rorobot ni na mondingi jala molo di Ulaon Saur Matua, sahat ma tu Hula-Hula ni na Marhaha-Maranggi, Hula-Hula ni Anak Manjae jala denggan ma sahat nang tu Bona Tulang, Tulang rorobot sahat tu Bona ni Ari.

Molo di Ulaon Saur Matua denggan ma jolo martonggo Raja (NA SAULAON) di sasa Marga asa sisada tahi sisada roha dohot pingkiran, sisada gogo di nalaho mangulahon ulaoni dohot dinamangadopi Tonggo Raja dohot horong ni Hula-Hula.

Di sude namargoar Tonggo Raja unang lupa manggokkon Dongan Sahuta dohot Ale-Ale ala didok do: Jonok partubu jonohan do parhundul, ai dongan sahuta do tampuk ni sude ulaon di hutai.

Di Ulaon Tonggo Raja/Mangarapot di Ulaon Saur Matua, naeng ma di parade Sipanganon namartudutudu (namarmiak-miak) alai anggo tonggo raja

05. Tingki Pangarapoton/Tonggo Raja:
Molo dung ma diida Protokol naung sahat angka Hula-Hula, Tulang dohot angka Dongan Tubu, disuru ma Boru laho paturehon hundulan namasiadopan.

PROTOKOL:
aa. Dihita na Mardongan Tubu Pomparan ni Ompunta si Raja Hutagalung, Borunami dohot Berenami, Dongan Sahuta dohot Ale-Ale, ala naeng pungkaonta ma Ulaon Mangarapot/Tonggo Raja rap dohot Hula-Hula dohot Tulangta, ro ma hita tu inganan naung pinarade di hita dison asa sada hita laho mangadopi horong ni hula-hulanta.

bb. Dihamu Borunami, parade hamu hian ma angka naporlu dohot sipatupaon di ulaon tonggo raja on. (buku, papan tulis, dohot sipanganon daon pogu)

cc. Di hamu Rajanami nahuparsangapi hami, Hula-Hulanami (didok margana jala unang lupa manambai hata Raja dijolo ni Marga), Tulangnami, Tulang Rorobotnami, Bona Tulangnami, Bona ni Arinami, Hula-Hula ni namarhaha-maranggi dohot hula-hula ni Anak manjae.
Mahuparade hami inganan di hamu Rajanami dina laho pungkaonta ulaon Pangarapoton. Ro ma hamu Rajanami asa tapungka ulaonta.

Dung pungu sude:
dd. Parjolo: jolo disise Protokol ma manang naung sahat sude Hula-Hulai, dipatangkas ma marga nasida, tutur, mamungka sian hula-hula. songoni di namardongan tubu, dohot dongan sahuta. Molo dung pungu sude disi, parjolo manungkun ma Protokol:

Di hamu Rajanami, andorang so tapungka panghataionta, paboaonnami do Rajanami, adong do huparade hami sipanganon di ulaon tonggo raja on, namanungkun ma hami: Jolo marsipanganon ma hita Rajanami asa manghatai ?? (biasana jolo marrapot ma.)

Di tingki martonggo Raja na Mardongan Tubu nunga ditontuhon hian: ise ma Panghatai, ise sijaha Riwayat Keluarga (Jujur Barita), ise Parhobas.

dd.1. Mandok hata huhuasi/hata mauliate di haroro ni angka tondong namandohoti ulaoni
dd.2. Manjaha Riwayat Keluarga (Jujur Barita)

dd.3. PARHATA: Songoni ma Rajanami, nunga rap hita umbege Riwayat Keluarga ni Ama/Ina namonding on jala dibagasanni Rajanami mangido hami di paniroionmuna di sangkap manang Rencana ni Ulaon nanaeng sipatupaonta di nalaho paborhathon Bangke
ni Amanta/Inanta natahaholongion tu ingananna parpudi di portibion, marsogot jala Rencananami i tarsongon on ma Rajanami:

dd.3.1. Parjolo: Songon Jujur Barita naung rap hita umbegesa, Ulaon dinalaho paborhathon Ama/Ina natahaholongion naeng patupaonnami ma nian:
ULAON SAURMATUA
Taringot disi ma jolo parjolo Rajanami hupangido hami paniroionmuna Hula-Hulanami dohot Tulangnami, baru pe asa tauduti annon di angka ulaon namangihut dohot angka sipatupaon.
Hupasahat hami ma tu hamu hula-hulanami Raja …….. hamu ma namangatur panghataion Rajanami.

dd.3.2. HULA-HULA : (dung di sise angka donganna sahundulan horong hula-hula)
Mauliate ma di hamu Pamoruonnami, las situtu rohanami dipangidoanmu di
Ulaon sipatupaonta dinapaborhathon Lae/Amangborunami – Iboto/Namborunami on tu ingananna parpudi di portibion ima Ulaon Saur Matua.
Sian hami hula-hulamuna panolopi ma hami di sangkapmunai, alai … ala dison do dongannami sahundulan, Tulang dst. …. Ba hupasahat hami ma jolo tu nasida asa sada alusnami di pangidoanmunai.
Dipasahat ma sungkun-sungkun (martingkat) mulai sian Tulang dst.
Sude do horong hula-hula dohot Tulang mambahen alusna jala molo dung hibul alus sian nasida didok hula-hula ma:

Di hamu Pamoruonnami, nunga dibege hamu, sude do hami manolopi pangidoan dohot sangkapmuna di Ulaon Sarimatua dinapaborhathon …………
Horas ma jala Gabe. Hupasahat hami ma tu hamu, lanjuthon hamu ma………

PARHATA: Mauliate ma di hamu Rajanami, sude ma hamu naung hupandok hami di pangoloionmunai di pangidoannami.

Nuaeng hupatorus hami ma jolo manaringoti rencananami di angka Ulaon dohot sipatupaon di ulaonta marsogot:
04. Taringot tu Boa-boaanna (BOANNA) patupasonnami ma Rajanami ima SIGAGAT DUHUT/GAJATOBA

05. Taringot tu na pasahat Ulos Rajanami tar songon on ma konsepnami:
ULOS SAPUT sian Tulangnami Raja …………….(molo Ama namonding)
Sian Tulang Rorobot Raja……….. (molo Ina namonding) alai jotjotan dipangido Hula-Hula Parboru tu Tulangna asa nasida Parboru ma napasahat Ulos Parpudi tu Boruna naung Saur matua.
ULOS SAMPETUA sian Hula-Hulanami Raja ………
ULOS HOLONG sian Bona Tulang, dst …
Ulaoni pungkaonta ma marsogot ari …..tgl…… diparnangkok ni mata ni ari jala songon on ma panjalonami Rajanami:

ULAON SAUR MATUA (udutna)

Parjolo ma jaloonnami Tulang napasahat Ulos Saput
dungi jaloonami ma Hula-Hula napasahat Ulos Sampe Tua.

Molo dung sidung napasahat Ulos Saput dohot Ulos Sampetua, mangido hami Rajanami di hamu horong ni Hula-Hula dohot Tulang ala marningot tu tingki hita, nanaeng pasahat Ulos Holong asa mangida tu naparjolo sahat ma nian sian angka hamu Bona Tulang, Bona ni Ari.. dohot Hula-Hula Naposo.

03. Taringot di Ulaon Paradaton/Marsipanganon Boan songoni napasahat
parjambaran, pangidoannami Rajanami patupaonta ma nian dung mulak sian udean, dinamangido hami di tangiangmuna dohot angka hata poda tu pomparan ni Ama/Ina namonding on, jala laos di ulaoni ma nian alusannami hamu Rajanami.

Songoni ma konsep di Renacana ni Ulaon Saur Matua nanaeng sipatupaonta Rajanami jala andorang so hupasahat hami pangidoannami tu hamu horong ni Hula-Hulanami parjolo ma jolo hupasahat hami taringot tu ulaon on tu Dongan Sahutanami.

Alus sian Dongan Sahuta : Horas jala Gabe songon dia nasinagkapanmuna Hasuhuton, sian hami Dongan Sahutamuna mandok: Sahata ma hita Rajanami.

Nuaeng, hupasahat hami ma tu hamu Hula-Hulanami dohot Tulangnami:

Dung masisisean angka horong hula-hula , Tulang jala ma sada tahi nasida dialusi ma:

Alus Parjolo:
Hutolopi hami ma rencanamunai di Ulaon Saur matua nanaeng sipatupaonta marsogot alai taringot tu panjaloonmu di haroronami asa taatur ma nian tingkina. (diatur ma tingkina : mamungka sian haroro ni Tulang – Hula-Hula dst.)

Alus napaduahon:
Taringot tu Renacanamunai sian hami horong ni Hula-Hula dohot Tulang manolopi ma hami disi, jala atur hma tingki panjalomuna di haroronami.
ALAI PANGIDOANNAMI taringot tu Ulaon Paradaton (marsipanganon boan dohot namarbagi parjambaran) dohononnami ma songon on:
Marningot tu tingki namansai porlu dihita ni di pangarantoan on, molo boi nian unang pola dung mulak sian udean tapatupa ulaoni alai tapatupa ma ditingki laho paborhathon (dung di alaman batang ni namondingi) jala laos dung simpul marsipanganon dibagi ma parjambaran, dungi namandok hata di alaman.

Biasana molo di Jakarta, alus napaduahoni do dilaksanahon ima tingki dung di alaman batang ni namondingi laos disi ma marsipanganon Boan dohot namarbagi parjambaran.
Dung sidung marsipanganon, dohot marbagi parjambaran mandok hata di alaman nama panimpulina.

SI ULAON DI PARMONDING NI NATUA-TUA (ULAON SAUR MATUA) udutna

PARHATA: (dung masisungkunan na Mardongan Tubu dohot Boru, Dongan Sahuta dapot ma keputusan mangoloi pangidoan ni Hula-Hula tu Ulaon napaduahoni)

Antong Rajanami, huoloi hami ma pangidoanmunai jala songon on ma hata dohot pangidoannami di acara:

Dung mulak sian Udean panakkohonnami do hamu sude horong ni Hula-Hula dohot Tulang tu bagas ima nalaho pasidung ulaonta huhut mangido hata togar-togar tu Ama/Ina namabalu Saur Matua on dohot tu sude pomparanna huhut mangido asa tangiangkon hamu nasida tu Tuhanta.Pardenggan basaI, di parhorason dohot panggabean.

Alus sian Hula-Hula :
di pasahat ma mangalusi parjolo sian Bona ni Ari, Bona Tulang, Hula-Hula ni na Marhaha-Maranggi, Hula-Hula ni Anak Manjae, baru pe tu Tulang jala parpudi ma sian Hula-Hula.
Hira sude do nasida SAHATA mandok songon on:
Mauliate ma di hamu pamoruonnami na tongtong pasangaphon hami horong ni Hula-Hulamuna: alai anggo didok rohanami:
Ndang pola be parsidohot hami di ulaon dung mulak sian udean.
Alus ni Tulang sibahen Saput dohot Hula-Hula sibahen Tujung :
Songoni ma tong alus ni Hula-Hula dohot Tulang

Antong Rajanami, huoloi hami ma pangidoanmunai jala songon on ma hata dohot pangidoannami di acara:

03. Anggo Hula-Hula na pasahat Ulos Sampe Tua dohot Tulangnami napasahat Ulos Saput dung mulak sian udean panakkohonnami dope hamu Rajanami tu jabu laho pasidunghon ulaon (ulaon sadari) laos ditingki ulaoni ma hami mangalusi hamu.

Di Bona Tulang, Bona ni Ari songoni nang Hula-Hula Naposo alusannami ma nasida diharoro nasida dung dipasahat nasida Ulos Holong

ULAON DI NAMONDING SAHALAK NATUA-TUA

Songon naung pinatorang diginjangi dapot ma tarida disi ragam ni ulaon namarasing-asing pangulahonna. Alai molo sude ulaon didasari holong na sian Tuhanta, sude doi une jala terlaksana dibagasan las ni roha dohot mauliate.Ido umbahen na sai pinajolo pabotohon rencana ni ulaon di tingki ulaon Tonggo Raja/Pangarapoton) asa dapot alus dohot kesepakatan di namangulahon sada ulaon. Hata torop sabungan ni hata, hata sasada hata lalaing.
Sai ingot ma hita marguru manungkun tu Dongan Tubu, Dongan Sahuta, tu Hula-Hula dohot Tulang. Molo tung adong saran sian hula-hula na asing manang pilit sian maksud dohot tujuan di ulaon nanaeng sipatupaonta, tarlobi di Ulaon di namonding sahalak natua-tua, denggan ma masipataluan roha asa sude ulaoni mardalan dohot denggan dibagasan las ni roha.

Angka di tingki namanghatai na pasahat Ulos Saput dohot Ulos Tujung/Ulos Sampe Tua ma na jotjot tarjadi perbedaan pandapot, ima pelaksanaan songon naung pinatorang di mulanai.

Angka na masa songon naung pinatorong di jolo:

01. Ulos Saput sian Tulangna – Ulos Tujung manang Ulos Sampetua sian Hula-Hulana.
02. Ulos Saput dohot Ulos Tujung sian Hula-Hulana (Balige)

Molo monding sahalak Ina :

01. Ulos Saput sian Tulang Rorobot – Ulos Tujung sian Hula-Hula
02. Ulos Saput sian Hula-Hula – Ulos Tujung sian Tulang
03. Ulos Saput sian Tulang Rorobot – Ulos Tujung sian Tulang (ala pasanagap Tulangna horong Hula-Hula ni na mondingi)

Molo dihita Pomparan ni Si-Opat Pisoran nunga taulahon:

Molo monding Ama manang Ina ba Tulang ni na mondingi ma sibahen Ulos Saput jala HulaHulana ma sibahen Ulos Tujung.
Alai tutu, molo dung Saur Matua Boruntai (Boru na mondingi) denggan ma hata pangidoan tu Tulangta asa sian hita ma Ulos Sasput dohot Ulos Sampetua dohot pangantusion disi nama hita parpudi pasahat Ulos tu Hela dohot Borunta naung Saur matuai.

Namarsipanganon (Boan) dohot namarsipanganon ulaon partangiangan:

Di Ulaon na Marsipanganon ditingki adong na monding sahalak natua-tua nunga jarang angka namardongan tubu/Dongan Sahuta namasisungkunan dung sidung marsipanganon.
Boasa, ia di Jakarta nunga pasudehu hita halak Batak tarihot di tingki, jadi sude ulaon Adat di na monding natua-tua, laos songoni nama mardalan ndang na pola masisungkunan.

Ala naung di Jakarta on hita, ulaon na di Jakarta ma jolo tataringoti :

MANOGOTNA DI NA MANJALO HARORO NI TULANG DOHOT HULA-HULA

01. PROTOKOL:
aa. disuru ma mangarade anakhon ni na mondingi, jongjong marturut sian siahaan sahat tu sianggian, dipudi ni barisan ni anak baoa, jongjong ma bagian Boruna (molo torop anakhonna) alai molo holan dua ripe do laos sabaris ma nasida.

Jongjong ma namabalui di halangulu.

MANOGOTNA DI NA MANJALO HARORO NI TULANG DOHOT HULA-HULA (ULAON SARIMATUA)

Mangarade ma manang piga Dongan Tubu dibagas manjalo dohot mangampu ulaon napinatupa ni Tulang dohot Hula-Hula.
Mangarade ma Boru laho manjalo Boras si Pir ni Tondi nabinoan ni Hula-Hula:

Di hamu saluhutna Tulangnami, dohot sude hamu Hula-Hulanami, ala naung sahat ma tingkina Rajanami, pungkaonta ma ulaon namanjalo hula-hula di ulaon parmonding ni Ama/Ina natahaholongi on:

Di hamu Tulangnami, (marga: ……..) nunga rade hami Rajanami manjalo haroromuna laho pasahathon ULOS SAPUT tu Ama/Inanami namonding on.
(molo Ina namonding Tulang Rorobot ma dijou pasahat Ulos Saput)

Jongjong ma Tulang sipasahat Ulos Saput dohot rombonganna di sabola siamun ni namondingi, jala andorang so dipasahat Ulos Saput, Marende, Martangiang, didok ma hatana:

Hata ni ULOS SAPUT:
Dihamu sude Pahompunami, pinompar ni berenami naung monding on (molo tingkat simatua napasahat ulos saput) sude berenami (molo tingkat Tunggane napasahat Ulos Saput) dohot di sude hamu namardongan tubu, na dohot do hami Ompungmuna, Tulangmuna dohot nantulangmuna, sude hami na punguon marhabot ni roha diparmonding ni Amanta /Inanta natahaholongion.

Najolo diparsorang ni Berenami on, hupasahat hami do Ulos Parompa. Nuaeng nunga monding ibana, ro ma hami Tulangna pasahat Ulos Saputna.
Asa dohononnami ma tu hamu Inang (molo Ina namabalui) Bere (molo Ama namabalui) doht tu hamu sude Pahompu/Berenami : Hupasahat hami ma Ulos Saput on tu Berenami naung monding on, dohot pangidoan di tangiangnami tu Amanta Debata Parasi RohaI, asa manaputi Parhorason, panggabean sian pasu-pasu ni Tuhanta di hamu sude pomparan ni Berenami on. (Laos diampehon ma Ulos Saputi tu na mondingi)

Molo tong adong Ulos Holong dipasahat ma sada tu Anak Baoa naung Hot ripe jala sada tu Boru naung hot ripe. (godang do ragam ni parsahat ni Ulos Holong tu Pomparan ni na Monding, targantung tu ihot-ihot holong ni roha antara hula-hula dohot pamoruon.
Olo do sipata dipasahat Ulos tu anak baoa manang Boru na so hot ripe dope alai ma tang anggo di umur, dohot pangidoan di tangiang ni hula-hula asa tumibu dapot rongkapna.

PROTOKOL: (molo so mulak be tu jabu dung mulak sian udean)
Di hamu Rajanami, Tulangnami, dohot nantulangnami ro di sude hamu uduran ni Tulang namarholong roha di hami, mauliate ma Rajanami di holong ni rohamunai naung pasahat Ulos Saput tu Ama/Inanami naung jumolo monding on. Unang lupa hamu Rajanami mamboan Ama/Inanami namabaluon dohot sude pomparanna di tangiangmu tu Tuhanta anggiat tumibu tarapul roha nasida

Songon naung rap taolophon Rajanami di Tonggo Raja, laos ditingkion ma hami ro manomba hamu Tulangnami laho pasahathon piso-piso dohot si palas roha di uduranmuna. Beha Rajanami, mangarade ma hamu asa ro hami.

Ro ma pomparan ni namondingi pasahathon piso-piso (sipata dipasada tu sude Ulos nadijalo alai adong do napasahathon tu sasahalak napasahathon jala sada ma si palas roha ni uduran ni Tulangi)

Rajanami, mauliate ma di hamu, huparade hami do sipanganon daon pogu di hamu, asa jolo mardaon pogu ma jolo hamu Rajanami paima tu acara napaborhathon Ama/Ina natahaholongi on tu ingananna parpudi di portibion. Mauliate ma.

PROTOKOL:
Di hamu nahuparsangapi hami Hula-Hulanami (Raja ……) ma mangarade hami Rajanami manjalo haroromuna laho pasahathon Ulos Tujung.

Jongjong ma Hula-Hula sipasahat Ulos Tujung dohot rombonganna di sabola siamun ni namondingi, jala sipasahat Ulos Tujung di jolo ni namabalui.
Andorang so dipasahat Ulos Tujung, Marende, Martangiang, didok ma hatana:

Hata ni ULOS TUJUNG:
Di ho Inang, Borunghu manang Amang hela, manang Lae, manang dihamu Ito, manang di ho Namboru: dison ro do hami Hula-Hulamu mandapothon hamu, paboa na rap do hita marsitaonon di parmonding ni Hela/Borunami on.
Ala naung parjolo monding Hela/Borunami on dison ro hami laho pasahat ULOS TUJUNG tu hamu napaboahon naung marsirang hamu di hangoluan on dohot Hela/Borunami naung monding on.
Huampehon hami ma Ulos Tujung on tu simanjujungmunaon napaboahon naung mabalu hamu, tanda naung holip sian parnidaanmuna Borunami/Namborunami manang Laenami/Helanami naung monding on, jala marhite nahuampehon hami Tujung on tu hamu didongani tangiangnami tu Amanta Debata Parasi Rohai, asa tanganNa nasumurungi ma mangondingi hamu sian sude arsak ni roha on., ditamparhon sian rohamu roha namandele, jala sai ditogu-togu Tuhanta ma hamu dohot sude Berenami on laho mandalani ngolumuna tu angka ari nanaeng ro.
(Mangampehon Ulos Tujung: sian siamun ni namabalui, tu simanjujungna torus tu hambirang, jala ingkon satonga pardompahan ni namabalui ditutup tujungi)

Andorang so ditutup hula-hula dohot tangiang panutup, mandok hata mauliate ma Protokol huhut didok:

Mauliate malambok pusu ma Rajanami di holong ni rohamunai di hami pamoruonmuna on, lumobi ma di naung pinasahatmuna Ulos Tujung tu Inanami/Amanami namabalu on.
Sai anggiat ma songon pangidoanmunai, sai Asi ma Roha ni Tuhanta, dao ma pandeleani sian Ina/Amanami naung mabalu on, sai tumibu ma tarapul rohana songoni nang sude pomparanna siala ni angka tangiangmuna hula-hulanami.
Rajanami, songon naung rap taolophon di pangarapoton nabodari, di namulak sian Udean anoon rap ma hita mulak tu bagasnami on laho pasidunghon ulaonta ima: Ungkap Tujung jala laos di ulaoni ma Rajanami alusannami angka nauli nadenggan napinatupamuna tu Ina/Amanami naung mabaluon, Sahali nari dohononnami ma mauliate godang ma di hamu saluhutna hula-hulanami dohot sude uduranmuna Rajanami.

Dung ditutup dohot tangiang:
Dihamu Rajanami Hula-Hulanami, Tulangnami dohot nantulangnami dohot di sude hamu namarholong ni roha di hami, adong do huparade hami sipanganon daon pogu Rajanami di sabola hambirang dung ruar hita sian bagas on, jolo mardaon pogu ma hamu Rajanami.

Dung sidung napasahat Ulos Tujung, di gora Protokol ma: Bona Tulang, Tulang rorobot, Bona ni Ari, martutur ma dijou sahat tu hula-hula ni Anak Manjae.

ULAON DI ALAMAN
Namambahen Ulaon di Alaman ima: di Ulaon Sari Matua dohot Ulaon Saur Matua, jala molo dung di alaman batang ni namondingi, (di Jakarta) dipungka ma namarsipanganon.
ULAON DI ALAMAN (udutna)

Senin, 22 September 2008

Hata tu angka Dongan na naeng marsiajar Paradaton

Mandapothon Napinarsangapan
Pomparan ni Ompunta si Raja HUTAGALUNG
Si Raja MIRALOPAK dohot Si Raja INAINA
na maringan di Jabodetabek.
Jakarta, …………………….

Khusus tu angka Dongan na naeng marsiajar di
Panghataion ni Paradaton na Pangolihon Anak/Pamuli Boru

Dison pinatupa do sada Buku na metmet/Buku Saku na ni enet sian Buku
BOHAL TU ULAON ADAT DI PARDONGAN SARIPEON DI HALAK BATAK
di Pomparan ni Ompunta Si Raja HUTAGALUNG di Jabodetabed

dohot pengharapan asa boi pangkeon ni angka Dongan Tubu di na laho mangulahon Ulaon Adat sada Paket sian mamungka na Patua Hata/Marhusip, Ulaon Tonggo Raja dohot Ria Raja, sahat tu Ulaon Unjuk Alap Jual-Taruhon Jual dohot tu na Marhata Sinamot di Ulaon Unjuk. dohot pangidoan asa sude nian hita Pomparan ni Ompunta Si Raja Hutagalung na di pangarantoan on boi mangulahon ulaon ni angka Dongan Tubu. di Ulaon Adat di na Pangolihon Anak dohot di na Pamuli Boru.
Molo adong na hurang lobi isi ni panghataion di na husurathon on, mangido ahu tu angka Dongan naung mapan di Ulaon Adat Batak asa olo mangalean roha dohot pingkiranna melengkapi Buku na metmet on asa gabe dumenggan parsiajaran ni angka Dongan Tubu na gabe dongan di angka Ulaon Adat.

Pesan dohot pangidoan tu angka Dongan si Ulahon Ulaon Adat asa tongtong berpedoman hita tu natinonahon ni Ompunta na parjolo i: DALIHAN NA TOLU dohot Hata na mandok:
Peak pe Adat sitongka do i langkaan, jongjong Adat sitongka do i tabaon.
Adat do Ugari sinihathon ni Mulajadi, Siradotan manipat ari, salaon di siulubalang ari.

Nang pe adong halak Batak na so olo be mangulahon Ulaon Adat di ngoluna ala naung asing pandohan na ni jalona sian donganna sahaporseaon, na mandok ulaon ni sipele begu do Adat Batak tarlobi di napasahat Ulos Herbang, alai unang ma lupa Halak Batak napinarorot ni Adat do angka Ompunta jala dimemehon Adat i tu angka pomparanna umbahen na tarihot Halak Batak di hasadaaon, parroha na masiurupan jala masitungkol-tungkolan, mabiar mangulahon na so tingkos di parsaoranna ala ni ihot-ihot ni Adat dohot Ugari ni Halak Batak.
Ai didok Apostel Paulus do di suratna tu Halak Rom Bindu 2 ayat 14 mandok: Ai diulahon angka Sipelebegu sian dirina do na pinangido ni Patik i, atik pe so adong Patik di nasida, asa gabe nasida sandiri ma songon patik di nasida na so marpatik hian.
Molo taterjemahon bebas pandohan i tu ngolu ni Halak Batak na mar-ADAT boi ma antusan tar songon on: Ai di ulahon Halak Batak sian Adatna do na pinangido ni Patik i, atik pe so a dong patik di nasida, asa gabe ihot-ihot ni Adat dohot Ugari sandiri ma songon patik di nasida.

Godang do na nioraan di Patik i, diorai di Adat Batak, didok do ingkon pasangaphon Natoras/natumua, ndang boi mambuat ripe ni dongan manang mangoli na mabalu ia so sahat dope ari-arina,diorai do martodos, mambuat arta ni dongan, margabus (jempek do pat ni gabus), mansai bahat dope na nioraan di Patik na tong dirorai di Adat Batak.

Tangkas do pinangido tu angka Dongan na olo mangulahon Ulaon Adat, songon on:

1. hibul dilean roha, pingkiran dohot gogona dibagasan las ni roha unang marpangait.
2. Parroha na lambas, lambok, unang parmuruk-muruk jala unang mura mandele.
3. Bisuk mangadopi angka nahumurang, unang olo muruk molo dipasingot dongan ditingki
adong songon napilit pandohan ni Adat di pandokna dibege dongan.
4. Olo mangajari huhut paturehon angka na rundut, patio angka na litok jala pature na sega.
5. Godang dope pangalaho ni si ulahon Adat alai pedoman ima: beha ma asa renta jala denggan
ulaon ni dongan molo dipasahat tu iba lao mangulahon.

HATA NA LAMBOK PAOMBUN RIMAS
HATA NA KORAS MAMBAEN MARSIGORGOR ATE-ATE.

Songoni ma jolo hata huhuasi dohot pangidoan tu hamu angka nahinaholongan jala molo tung adong nahurang lobi panghataion nahupasahat on, mangido ahu tu hamu asa olo hamu mamafhon ahu disi asa songon nidok ni umpama:

Pege sangkarimpang, hunik sahadang-hadangan,
manimbung rap tu toru, mangangkat rap tu ginjang, tongtong satahi saoloan.

Loting di tomboman, tabo nasiniraan,
Tondinta ma masigonggoma, dao ma na masisaritaan.


Horas Jala Gabe
Panurat : St. D.P.Hutagalung/Br. Simarangkir (O. ni Salomo)

Pesta Unjuk ALAP JUAL Diinganan ni Hutagalung Ompu Tuan Napitu

ANGKA SIULAHONONHON DI PESTA UNJUK ALAP JUAL Diinganan Parpestaan Peranan pesta : di Pomp. ni Hutagalung Ompu Tuan Napitu

PROTOKOL PARBORU – PANDE JUHUT : ...................
Ulaonna : ......................
PROTOKOL : Andorang so masuk Penganten dht Suhut Sihabolonan

1. Manggora : Di hita na mardongan tubu si Raja Hutagalung, Boru, Bere, Dongan Sahuta dohot Ale-Ale, masuk ma hita tu bagas, jala hundulan di hita ima disabola siamun dung masuk tu gedung on.

2. Di hamu Pamoruonnami, Raja Simanjuntak; Amangboru, ma huparade hami inganan di hamu, di sabola hambirang dung masuk tu gedung on.

3. Paradehon PARHOBAS : a. Parhobas na di Pintu Masuk.
b. Parhobas ni inganan ni Hula-Hula
c. Parhobas si Jalo Tandok dohot Siuk
d. Parhobas si pasahat ulak ni Tandok/Siuk

4. Masuk Penganten dohot Rombongan ni Suhut Sihabolonan
a. Di hamu Borunami na di pintu masuk, beha ma rade Suhut Sihabolona OK
b. Di hamu nahuparsangapi hami, Amanta Raja dohot Inanta Soripada, ala naeng masuk ma Penganten dohot Uduran ni Suhut Sihabolonan, dohot hormat mangido hami, di na menyambut nasida, rap jongjong ma hita.
c. Di hamu Suhut Sihabolonannami, Mauk ma hamu. ….. MUSIK
d. Dung sahat Penganten di Podium
e. Mauliate ma di hamu – hundul ma hita.
f. BORUNAMI NA DI PINTU MASUK: beha ma rade hula-hulanta ? OK.
g. Di hamu Suhut Bolonnami, ala naeng manjalo haroro ni Hula-Hula dohot Tulangta, ro ma hamu sian Podium i.
h. Amang Parmusiknami, naeng manjalo haroro ni Hula-Hula dohot Tulangnami, mangarade hamu patupahon musik nahombar tu si.
i. MANGGORA HULA-HULA dohot TULANG:
Hata Panggoraon :Dihamu nahuparsangapi hami Raja ni Hula-Hulanami dohot Tulangnami, ndang namangorui di sangapmu Rajanami, alai namangait tu tingki do hita, asa sahali manjanghon ma hami nian Rajanami diharoromuna; jala tar- songon on ma panjanghonnami:
Di-jolo ma uduran ni Hula-Hulanami Raja ………...Ihut ma muse Tulangnami Raja ………… Tulang Rorobotnami Raja……...Bona Tulang Raja ……… Dungi Bona Ni Arinami Raja ………..Ihut ma Hula-Hula ni Namarhaha Maranggi Raja …………dohot Hula-Hula ni Anak Manjae Raja…..
j. Masuk ma hamu Rajanami – M U S I K

5. Dung sahat tu jolo didok ma : Horas ma di hamu Raja ni Hula-Hulanami dohot Tulangnami: ma huparade hami hundulan di hamu Rajanami, di sabola siamunnami, hundul ma hamu Rajanami.

6. BORUNAMI: patuduhon hami hundulan ni Raja ni Hula-Hulanta

7. PASAHAT ACARA PANGGORAON TU Protokol Paranak: Amangboru: ala naung singkop masuk sude Raja ni Hula-Hula dohot Tulangnami, hupasahat hami ma Acara Panggoraon tu hamu. Mauliate.

8. PROTOKOL PARANAK:
Mauliate ma Tulang: Songoni ma di hamu Suhut Sihabolonan, ala naeng manjanghon haroro ni Hula-Hula dohot Tulangta ma hita, ro ma hamu sian Podium i.

9. Selanjutna songon dia panggoraon ni Parboru di Hula-Hula dohot Tulang, songoni do tong panggoraon di Paranak dohot pasahathon hundulan di nasida
PASAHAT TUDU-TUDU NI SIPANGANON
DOHOT DENGKE SIMUDURUDUR

10. Protokol Paranak: Beha Tulang naeng ro ma hami pasahat tudu-tudu ni sipanganon, mangarade ma hamu.

11. Protokol Parboru: Nauli Amangboru rade ma hami, ro ma hamu: Di hamu Suhut Bolonnami, ala naeng ro ma Borunta lao pasahat tudutudu ni sipanganon ro ma hamu tu inganan on. Songoni ma nang di hita na mar Dongan Tubu Pomparan ni si Raja Hutagalung ro ma hamu tu jolo on asa rap manjalo hita di tudutudu ni sipanganon napinasahat ni Borunta Jolo dipasahat ma Dengke asa masijalangan:

12. BORUNAMI: Boan hamu ma tuson Dengke sipasahatonta
Hatana di napasahathon Dengke.
Dihamu Borunami Raja ……….: Parjolo ma hita mandok mauliate tu Amanta Debata, siala Asi ni rohaNa dilehon dihita ari nauli, sadarion marlas ni roha. Nangkining, ma dipasahat hamu tu hami tudu-tudu ni sipanganon di ulaonta sadarion, las rohanami manjalo huhut mandok mauliate.
Dison, ro do hami pasahathon tu hamu: Dengke simudur-udur, Dengke sitio, Dengke sahat, dohot tangiang pangidoan tu Tuhanta Pardenggan BasaI, Sai mudur-udur ma antong parhorason panggabeani di hamu, Dengke sitio ma on, asa sai tio ma nang angka parngoluan dohot pansamotani dapotonmu tu joloan on. Dengke sahat ma on, sai sahat ma tutu basabasahonon ni Tuhanta, angka nauli nadenggan nataparsinta di ankhonta naung mamungka parbagason on. Tung songon on pe naboi tarpasahat hami Dengke Simudur-udur on tu hamu ditingkion, las ma rohamu manjalo. Botima.
Masijalangan.

13. Dihita na mar-Dongan Tubu Pomparan ni si Raja Hutagalung, Borunami dohot Berenami, Dongan Sahuta dohot Ale-Ale. Tarlobi ma di hamu Raja ni Hula-Hulanami dohot Tulangnami:
Dison, nunga dipasahat Borunta Raja ……………. tu hita tudu-tudu ni sipanganon di ulaonta sadarion, molo tung dijolo ni hasuhuton pe nuaeng tudu-tudu ni sipanganon on, naung rap manjalo ma hita di si. Mauliate ma.

14. Beha Amangboru Raja …………; asa tapungka namarsipanganon, ala hamu do napatupahon sipanganon di ulaonta on, tu hamu ma hupasahat hami mamboanhon di tangiang laho mangan tu Tuhanta.
Paranak pasahat sulang-sulang natabo tu Parboru

15. Manjahahon Daftar ni namamboan SIUK.

16. Marbagi Parjambaran Juhut:
Sungkun-sungkun tu Paranak :

17. Amangboru Raja …………., nagkining nunga dipasahat hamu tu hami tudu-tudu ni sipanganon di ulaonta on. Namanungkun ma hami tu hamu Amangboru, beha hatana taringot tu tudu-tudu ni sipanganon on.
Alus ni Protokol Paranak :
Mauliate Tulang, taringot tu tudu-tudu ni sipanganon naung hupasahat hami tu hamu ba hamu ma Tulang namangaturhonsa, sidapot solup ma hami.

18. Antong Amangboru, andorang so disseat raut, parjolo ma diseat hata; songon on ma na masa taringot tu parjambaran di hami si Raja Hutagalung:
Selain ni Osang dohot Ihur-Ihur, sude ma tabagi dua:
Jadi sipasahatonnami tu hamu ima: 2 soit, satonga somba-somba, dohot parsanggulan parhambirang. Beha Amangboru ? OK.

PARANAK MANGIDO TINGKI MANJALO TUMPAK

19. Dihita namardongan tubu, Hahadoli dohot Anggidoli ro hamu tu joloon asa rap hita pature parjambaran on.
antong molo dos tahinta, beha parjolo ma tapasahat jambar tu hula-hulanta?? (Horas jala gabe)

Parbagi ni Parjambaran:
01. Osang himpal tu Hula-Hula : Raja …………….
02. Somba-Somba : Tulang : Raja ………………..
Tulang Rorobot Raja ………………
Bona Tulang : Raja ………………
Bona ni Ari : Raja ………………

Hula-Hula Namarhaha Maranggi: 01 Raja ……………….
02. Raja ………………….
03. S o I t : 01. Ompu Datu Harean
02. Ompu Matasapiaklangit
03. Ompu Datu Sorga
04 Ompu Sibulungmotung
05. Ompu Partombus
06. Punguan ni si Raja Hutagalung
04. Parsanggulan Parsiamun : Boru dohot Bere ni Hutagalung
05. S o i t 08. Dongan sahuta + Ale-Ale
09. Pariban ni Hasuhuton Bolon (Br. ……………)
10. Pangula ni Huria
11. Dongan Parhundul – Tulang ni Pangoli
Boi do pasahaton ditingki pasahathon Tintin Marangkup.
Protokol: molo tung adong nalupa hami di-napasahat parjambaran juhut on, masi-ingotan hita asa hugorahon hami parjambaran di nasida.
Molo hurang Parjambaran i: dibuat ma sian Ihur-Ihur i.
07. Jambar ni : 1. Haha-Anggi nasapanganan
08. Jambar ni Haha-Anggi : Dongan Sabutuha
09. Natinggal i ma : jambar ni Suhut Bolon marhaha-maranggi

Marhata Sinamot:
Molo dung renta sude:
Protokol: Di hita namardongan tubu Pomparan ni si Raja Hutagalung, Boru/Bere, Dongan Sahuta dohot Ale-Ale, tapadenggan ma parhundulta asa tipak hita laho mamungka panghataion dohot Raja ni Pamoruonta Raja ……………….

Borunami, ala naeng pungkaonta ma panghataion, denggan ma bahen hamu
hundulan ni Hula-Hula dohot Tulangta.

Di hamu Raja ni Hula-Hulanami/Tulangnami
Hula-Hulanami Raja …………, Tulangnami Raja …………….. Tulang Rorobot: Raja ………….; Bona Tulang : Raja …………; Bona ni Ari Raja ………………..;
Hula-Hula ni namarhaha-maranggi :Raja ………… dohot Raja ………………..
Nunga huparade hami hundulan di hamu Rajanami disabola siamunnami, tangkas ma hamu hundul Rajanami laho maniroi hami di panghataionnami dohot Pamoruonnami Raja ………………..
Gora tu Paranak Raja ……………….:
Di hamu Amangboru Raja ……………– Beha Amangboru, Marnida hita tu tingki, ma boi udutanta ulaonta ?? --OK—
Antong , jolo masipasangapan ma jolo hami namar-Dongan Tubu tarlobi dohot Hula-Hula dohot Tulangnami, asa hupataripar hami tu hamu panghataion.

Masisungkunan Pomp. Ni si Raja Hutagalung:
Protokol : Di hita na Mardongan Tubu Pomparan ni si Raja Hutagalung:,
Songon naung rap hita umbotosa, ia Ulaonta on ima na dihasuhuthon ni Pomparan ni Ompu Miralopak, jala Hasuhuton Bolon ditingkion ima sian Ompu TUAN NAPITU.
Sada do hita songon daion mual, sisada Anak, sisada Boru di sude ulaonta.
Ia di hami Pomparan ni Miralopak ma nuaeng manghasuhuthon Ulaonta sadarion, songon nidok ni Umpama ma dohononnami: Tinallik huling-huling, tarida holi-holi, ia di hami Pomparan ni Miralopak ma nuaeng namanghasuhuthon ulaonta on, ba hamu Anggi doli Pomparan ni Ompu si Raja Ina-Ina ma panamboli. Antong, di hamu Anggidolinami Pomparan ni Ompu si Raja Ina-Ina: Matasapiak Langit, Datu Sorga, Sibulungmotung, dohot Partombus. Hamu ma Anggidoli namasiaturan, na gabe Raja Parsinabung, hupasahat hami ma tu hamu. Mauliate ma.

Songoni ma nang di hamu Hahadolinami Pomparan ni Ompu Datu Harean, hamu ma Hahadoli na gabe Suhut Paidua di ulaonta on laho mangalusi molo tung adong sungkun-sungkun sian Anggidolinta si Raja Ina-Ina. Mauliate ma

Masisungkunan ma Raja ni Anggi Doli: Matasapiak Langit, Datu Sorga, Sibulungmotung, dohot Partombus manang ise ma sian nasida nagabe Panamboli/Parhata
Dung sada roha nasida dipungka ma manghatai, songon on:

PARSINABUNG :
Dihamu Suhutnami, Gokkon sipaimaon, Jou-jou sialusan, ia nunga ro hami nuaeng dison lao mangalusi gokkon dohot jou-joumu, jala hundul hita nuaeng di amak tiar dialaman antaran nabidang on asa tiar ma antong parsaulian tiar parhorason panggabeani dihita tumpahon ni Amanta Debata Parasirohai.
Ia naung butong hita mangan indahan nalas, sagat marlompan nataboi, huhut minum aek sitio-tio napinatupamuna, sai pamurnas ma i tu daging, saudara tu bohi, sipalomak imbulu sipaneang holi-holi, ia namanungkun ma hami tu hamu Hahadoli, dia ma nangkatna dia ma ultopna, dia ma hatana dia ma nidokna dialusi Raja ni Hahadoli ma.

SUHUT PARBORU PANGALUSI:
Horas ma jala gabe Anggidoli, mauliate ma di Tuhanta Pardenggan basai, mauliate ma nang dohononnami tu hamu diholong nirohamunai di hami, ro do hamu antong mangohi gokkon dohot jou-jounami, Sai ro ma haroan marharoan tu joloanon, jagar hata dibahen hamu songon namarlompan hunik, jala dipatama hamu hata i songon namartondi eme, sai tubu ma najagar tu hita on tumpahon ni Amanta martua Debata, dohot Tondi ni Amanta Raja naliat nalolo on.
Ia hata ni sipanganon naung tapangani Raja ni Anggidoli dohononnami ma:
Godang sibutong-butong otik sipir ni tondi, ia tung so sadia pe sipanganon dohot siinumon naung tahasagathon i ba sai pamurnas ma i tu daging saudara tu bohi. Ndang namangholit hami ba molo tung pe namangholit sai tamba ma naniholit. Ia alus ni sungkun-sungkun ni -Anggidoli paboaonnami ma tutu:
Parhorasan Panggabean do Anggidoli. Botima

PARSINABUNG
Horas ma jala gabe Hahadoli, parhorason panggabean do hape pinaboana, ia marangkup songon nahundul, mardongan songon namardalan, marangkup do nauli mardongan do nadenggan, asa tangkas ma purba, tangkas ma angkola, asa tangkas hita maduma tangkasan ma namamora, tumpahon ni Tuhanta: asa angkup ni parhorasan panggabeani tangkas ma dipaboa Hahadoli asa dibege angka Amanta Raja dohot Inanta soripada tarlobi Hula-hulanta. Dohot Tulangta.
Songoni ma hahadoli sungkun-sungkunami, dialusi Hahadoli ma.

SUHUT PARBORU PANGALUSI
Horas ma jala gabe Anggidoli; marangkup do tutu nauli mardongan do nadenggan asa tangkas ma purba tangkas ma angkola asa tangkas hita maduma, tangkasan ma namamora marhite-hite pasu-pasu ni Tuhanta, ba angkup ni parhorasan panggabeani paboaonnami ma tutu:
Ia diari nauli ari nadenggan on nanilehon ni Tuhanta dihita marlas ni roha, na ro do pamoruonta, Raja ………… mandapothon hita Hula-hulana, jala naung masiadopan hita nuaeng di bagas namarampang namarjual sigonggom pangisina on, ba asa, haru tumangkas botoonta diharoro nasida, ba hupasahat hami ma tu hamu Anggidoli laho manungkun haroro nasida mandapothon hita, botima Anggidoli

PARSINABUNG
Horas ma jala gabe diboa-boamu,
na ro do hape pamoruonta Raja ………, mandapothon hita.

Hata ni parsinabung tu Horong Hula-Hula: Songoni ma dihamu nahuparsangapi hami Raja ni Hula-Hulanami dohot Tulangnami: (digorahon ma Marga nasida mamungka sian: Hula-hula-Tulang-Tulang Rorobot-Bona Tulang-Bona ni Ari –Hula-Hula ni namarhaha-maranggi dohot Hula-Hula ni Anak Manjae) laos didok ma :
Rajanami, Raja Bolon: (digora ma Marga ni sude Hula-Hula sesuai tu susunanna) songon naung rap hita umbege boa-boa sian Suhut Sihabolonan, ia sadarion nunga masiadopan hita dohot Raja ni Pamoruon Raja ………………….. na ro mandapothon hita di hutanta on. Namanungkun ma hami: Beha Rajanami, ma denggan hundulanmu na huparade hami di siamunnami? Mauliate ma: antong, naeng pungkaonnami ma manghatai dohot Raja ni Pamoruonnami, asa didok Ompunta naparjoloi: Ranting ni Bulu Duri, sanjongkal dua jari, Raja na burju do hamu manuturi dohot naburju mangajari hami Pamoruonmuna dipanghataionnami dohot Pamoruonnami. Mauliate ma.
diandehon ma hatana tu Raja Parhata ni Paranak. Boha di hamu Pamoruonnami, Raja ……… ……..marade hamu asa manghatai hita

PARANAK- (Pangalusi parjolo: Protokol)
Horas ma jala gabe Rajanami, Marade be alai Rajanami asa tangkas hami laho mangalusi sungkun-sungkun ni Rajai lehon hamu ma jolo tingki dihami asa manghatai jolo hami namarhaha-maranggi tarlobi dohot Hula-hulanami.
(Panghataion namasipasangapan namardongan tubu Paranak dohot Hula-Hulana sarupa do songon panghataion ni Parboru di namasipasangapan)
Dung dapot nasida Raja Hata laos Raja Hata i ma na paboahon kesiapan nasida tu Parhata ni Parboru. Rajanami ma rade be hami pamoruonmu, tapungka ma ulaonta

PARBORU
Horas ma jala gabe Raja ni Boru. Ia didok umpama: dolok ni Sipakpahi Panatapan tu Sibuluan, asa tapungka manghatai Raja ni Boru pasahat hamu ma jolo Pinggan Panungkunan

PARANAK
Mauliate ma Rajanami, ia binsar songon mataniari, marsinondang songon bulan ba nunga manggora hula-hula laho mamungka manghatai ba dison pasahatonnami ma Pinggan Panungkunan.
Borunami, pasahat hamu Pinggan Panungkunan on tu jolo ni Hula-hulananta

PARBORU
Mauliate ma Raja ni Boru (Amangboru), dison nunga dipasahat hamu Pinggan Panungkunan, Pinggan sitio suara, asa tio marsoara, , Pinggan Pasu, nahot dihundulanna, sai hot ma pasu-pasu ni Tuhanta dihita, songoni muse peak do diatasna Napuran sirata bulung sipalas roha ni Inanta Soripada/ Boru ni Raja, ba sai rata ma antong parhorasan panggabean i dapotonta tujoloan on, huhut do dison boras sipir ni tondi, parbue siribur-ribur sai anggiat ma torop maribur angka pomparanta huhut matangkang manjuara, asa pir ma pongki bahul-bahul pansalongan, pir ma tondi sai tu tambana ma pansamotan, dison muse ringgit sitio suara/Rupia namararga, homitan ni boru ni Raja, sipatamba las ni rohanta diloloan bolon on. (dibuat parsinabung ma hepeng i 3 lembar, salembar dilehon tu Dongan Tubu di hambirang, salembar tu siamunna, salembar di Parsinabung)

Laos didok ma hatana : Amangboru: Nunga hujalo hami Pinggan Panungkunan on, nuaeng hupasahat hami muse tu hamu asa gabe Pinggan Pangalusi.
Dijou Boru : Hamu Borunami pasahat hamu ma jolo Pinggan Panungkunan on tu Raja …………… Paribanmu:

Manghatai ma hita Amangboru:
Ba ia hundul hita nuaeng diatas ni amak tiar dijabu namarampang namarjual sigonggom pangisina, sai tiar ma antong parhorasan panggabeani di hita tu angka ari na ro. Ia nunga simpul hita mangan indahan na las, hinabosurhon, huhut marlompan natabo i, nihasagathon, songoni nang minum aek sitio-tio, sai tu tiona ma angka pansamotan, parsauliani tu joloanon tumpahon ni Amanta Pardenggan Basai. Ia namanungkun ma hami nuaeng Raja ni boru Dia ma nangkatna dia ma ultopna dia ma hatana dia manidokna dipaboa Raja ni Boruma.

PARANAK
Horas ma jala gabe Rajanami, Andorang so hualusi hami sungkun-sungkun ni Raja i dohononnami ma: Tangan do botohon. Ujungna jari-jari, jari-jari sampulu sude do i marpanggoari, andorang so nidok hata sidohonon, parjolo ma hami marsantabi: Sungkun-sungkun ni Raja i alusannami ma tutu :
songon nanidokmunai ma tutu …..

songon nanidokmunai ma tutu, sai tu tiarna ma parhorasan panggabeani sai lam tu tiona angka pansamotani dihita tu angka ari nanaeng ro: Taringot tu Sipanganon masak Rajanami dohononnami ma:
Godang sibutong-butong, otik sipir ni tondi. Tung so sadia pe nahuparade hami sipanganoni, sai pamurnas ma i tu daging, saudara tu bohi, sipalomak imbulu mai sipaneang holi-holi, hinarat pangkal ni tobu lam tu tonggina, ndada namangholit hami Rajanami tung sibahenon do so sadia, molo tung pe namangholit Rajanami siala ni tangiangmu tu Amanta Debata sai tu tambana ma naniholit.
Sai songon bagot namarhalto ma natubu di robean, horas ma hamu Rajanami namanganhon horas antong nang hami namangalean. Taringot tu sungkun-sungkun ni Rajai, alusannami ma tutu: Parhorasan Panggabean do nidokna, boti ma Rajanami.

PARBORU
Horas ma jala gabe Amangboru dialusmunai, ia didok hamu parhorasan panggabean do hape nanidokna, ba mauliate ma tadok tu Amanta Debata Pardengganbasai, tutuma songon nanidokmunai sai songon bagot namarhalto ma natubu dirobean, sai horas ma hami namanganhon horas ma hamu namangalean., asa.
Timbo dolok martimbang panatapan tu pangaloan, Sai manumpak ma Amanta Debata nadiginjang, sai ro ma dihamu singkat ni i marlipat ganda angka pansamotan Ia namarangkup songon nahundul, mardongan songon namardalan, marangkup do nauli mardongan do nadenggan,
asa tung tangkas ma purba, tangkas ma tutu angkola, asa tangkas hita Maduma, tangkasan ma na-Mamora, angkup ni parhorasan panggabean i haru tangkas ma dipaboa Raja ni Boru, asa tangkas dibege angka Amanta Raja, dohot Inanta Soripada tarlobi angka Raja ni Hula-Hula, dohot Tulangnami, botima da Raja ni Boru

PARANAK
I ma tutu Rajanami, mansai las situtu rohanami umbege sungkun-sungkunmunai, tutu ma hamu sisuan bulu jala panjala, siboto uhum do hamu jala angka anak ni Raja.
Songon nanidokmunai Rajanami asa tangkas ma purba tangkas ma angkola, jala asa tangkas hita maduma, tangkasan ma namamora, paboaonnami ma rajanami angkup ni parhoransan panggabean i: Didok umpama ni ompunta najolo:
Denggan ma bulu godang, denggan baen hite-hite. Molo adong anak manang boru magodang denggan ma asa hot ripe. Asa tubuan laklak tubuan singkoru, tubu sanggar diparsopoan, asa tubu dinasida anak dohot boru jala jengkar-jengkar dihangoluan.
Ia dimanang piga ari nasalpu nunga ro hami manomba hamu Rajanami, jala ma satahi saoloan hita Rajanami disangkap ni angka anakhonta asa hot ripe, jala nagkining diparnangkok ni mata ni ari nunga rap hita mangudurhon anakhontai tu adopan ni Debata di Bagas JoroNai asa manjalo pasu-pasu parbagason marhite Naposo ni Tuhanta. Nunga terlaksana i dohot denggan.sohariboriboan,
Mauliate ma di Tuhanta Pardenggan Basai. ………

Mauliate ma di Tuhanta Pardenggan Basai.
Marpungu ma hita nuaeng dibagas namarampang namarjual sigonggom pangisina on, asa mangido ma hami nian Rajanami diharadeon ni rohamu asa tauduti ma nian ulaonta NA - MARHATA SINAMOT

PARBORU
Tutu ma nanidokmunai Amangboru, denggan ma bulu godang denggan baen hite-hite molo dung magodang anak manang boru denggan ma asa hot ripe. Jala didok hamu asa tauduti ulaonta NAMARHATA SINAMOT. Mauliate ma di Debata:, Mauliate ma dihamu Raja ni Borunami.
Ai nunga pitu lilinami paualu jogianami, nunga nauli nipinami ma adong hamu pandurungannami,, ba tangkas do huboto hami anggo hamu :
Pat ni gaja tu pat ni hora angka pomparan ni Raja do hamu jala angka namamora. dibahen i pasahat hamu ma sinamoti mansai godang. Botima hatanami Raja ni Boru

PARANAK
Mauliate ma Rajanami, tutu do nanidokmunai Pat ni gaja tu pat ni hora angka anak ni Raja do hita jala angka namora, alai tumangkas do Rajanami dohononnami rap Anak ni Raja do hita naburju marroha.
Ala ndang imbulu sinuanhon be hami jala huling-hulingnilangkophon tu hamu Rajanami, naung borumuna hian do hami sian angka ompunami,.
Ai songon nidok ni umpamai Rajanami Urat ni Singkoru, dihunghupi bulung bira, anggo haburjuon ni hamu Raja Hutagalung marboru nunga tarbarita sahat ro didia.
Mangingot i do hami Rajanami umbahen nabarani hami ro toadopanmu ai ida-ida do nabutong jora-jora do namale. Jadi namarsomba ma hami tu hamu Rajanami taringot tu Sinamot ni Parumaennami, tarsongon on ma nian Rajanami elek-eleknami asa si sahali manombahon ma hami Rajanami disomba ni Uhum, somba ni Adat di-godang ni Sinamot ni Parumaennami sipasahatonnami tu hamu Hula-Hulanami.
Songoni ma somba pangidoannami tu hamu Rajanami.

PARBORU
Horas ma jala gabe Raja ni Boru, pangidoanmu asa sahali mangelekhon sahali manombahon hamu di somba ni uhum, somba ni Adat, dohot godang ni Sinamot, anggo ahu sandiri ala tangkas do hamu tinanda naburju marhula-hula. alai Amangboru, asa tung tangkas begeon ni angka Amanta Raja dohot Inanta Soripada dipangidoanmu di Somba ni Uhum, Somba ni Adat dohot di hata ni Sinamot sipasahatonmu haru dipaboa Raja ni Boru ma

PARANAK
Mauliate ma Rajanami, malambok pusu, tangkas ma tutu paboannami pangidoannami tujolo ni Rajai, di Somba ni Uhum, Somba ni Adat dohot dihata ni Sinamot sipasahatonnami tarsongon on ma Rajanami pangidoannami: di hata ni Sinamot: SITOMBOL ma nian Rajanami. ALAP JUAL ma Parumaennami jala ULAON SADARI. Songoni ma jolo somba pangidoannami Rajanami.

PARBORU
Dihita namardongan tubu, songoni nang Boru dohot Berenami, tarlobi di hamu sude nahuparsangapi hami Raja ni Hula-Hulanami dohot Tulangnami, nunga rap umbege hita dipangidoan ni pamoruon asa sisahali mangelekhon/manombahon ma nasida Disomba ni Uhum, di somba ni Adat dohot di hata ni Sinamot sipasahaton nasida, ima Sinamot na-Gok Sitombol, Alap Jual ma Borunta jala Ulaon Sadari, beha alusmu:

Songon on ma pangatur ni panungkunan:
BORU : Mauliate ma Rajanami, diingot hamu do hami antong Borumu, anggo sian hami Borumu, alusnami sipangihut do anggo hami, songon dia pe haputusanmu Rajanami, namangihuthon ma hami, botima hatanami Rajanami.

Parhata Parboru mangandehon hata tu sude Hula-Hula:
Di hamu saluhutna Hula-Hulanami; (unang lupa mandok Harajaon Nasida Hula-Hulai) nunga rap hita Rajanami umbege pangidoan ni Pamoruonnami di Somba ni Uhum, Somba ni Adat dohot di hata ni Sinamot sipasahaton nasida tu hita asa sahali mangelekhon, sahali manombahon.
Andorang so hualusi hami pangidoan ni Pamoruonnami asa pos rohanami Rajanami mangido ma hami di-panuturion sian hamu sude Hula-Hulanami dohot Tulangnami, ai songon nidok ni Ompunta sijolo-jolo tubu : Dipudi hamu sipaimaon, dijolo hamu siaduon, Sihorus nasuksuk do hamu, sigohi nalonga, hupasahat hami ma panghataion on tu hamu Rajanami.

(laos digora ma Boruna laho pasahathon Microphone tu Hula-Hula)

Hata sian Hula-Hula: (dung jolo masisisean horong Hula-Hula, dipasada ma hatana laos Hula-Hula (tulang ni Boru Muli ma) na manghatahon:)
Horas ma jala gabe dihamu Raja ni Borunami, Taringot ni pangidoanmu tu hami hula-hulamu dohot Tulangmu, nunga satahi hami, ahu ma namangalusi:
Mansai las rohanami umbege panghataionmuna hamu namarhula-marboru naung masipaolo-oloan ba sian hami hula-hulamu sidohononnami tu hamu ba Balintang ma Pagabe tumandanghon sitadoan, sai Asi ma roha ni Tuhanta, ba arimuna ma gabe molo olo hamu masipaolo-oloan. Songoni ma hata sian hami hula-hulamuna


PARBORU Didok ma mauliate di paniroion ni Hula-Hula.

DONGAN TUBU: (tarsongon on ma nian alus sian dongan tubu) mauliate ma Hahadoli/Anggidoli, songoni pos ni roham dipangidoan ni Pamoruonta songoni do nang hami, tandokmu do tandokku, pandokmu do pandokhu, ba naung sahata ma hita Hahadoli/Anggidoli songon dia pandokmu/ alusmu tu Pamoruonta songoni do nang alusnami, hupasahat hami ma tu Hahadoli

PARBORU
Songoni ma dihamu Raja ni Pamoruonnami, nunga dibege hamu panghataion sian Dongan tubu, Borunami, tarlobi sian Hula-Hulanami, alai andorang so hualusi hami pangidoanmunai Amangboru, haru dipatangkas Amangboru ma Somba ni Uhum, somba ni Adat dohot godang ni Sinamot ni Borunami nanaeng sisombahononmu tu hami, asa dibege sude Amanta Raja dohot Inanta Soripada naliat nalolo, songoni ma Raja ni Boru

PARANAK
Horas ma jala gabe Rajanami, ala dison do hami namardongan tubu, borunami, tarlobi dohot hula-hulanami, asa tung tingkos pos ni rohamu naung sahata hami taringot tu elek-eleknami i tu hamu, lehon hamu ma jolo tingki dihami asa manghatai hami Rajanami.
Catatan : 1. Adong do sipata: andorang so dipangido Prsinabung Parboru alus sian Boru, Dongan tubu dohot Hula-Hula, jolo didok tu Paranak asa jolo “Hubege hami, naung satahi hamu di pangidoanmuna i.”
2. Molo songoni sipata: dinapaboahon sisahali manombahon, sisahali mangelekhon i Paranak gabe dohot ma didok godang ni Sinamot i.
3. Hape maksud ni pangidoan sisahali manombahon-sisahali mangelekhon dope anggo sialusan (ai tarida disi pos ni roha)

Hata Pangidoan ni Paranak tu Dongan Tubuna, Boruna dohot Hula-Hulana:
Hata pangidoan tu Hula-Hula dohot Tulang:
Songoni ma dihamu saluhutna nahuparsangapi hami Raja ni Hula-Hulanami dohot Tulangnami nunga dibege hamu pangidoannami tu Raja ni Hula-Hulanami asa sahali manombahon sahali mangelekhon nian hami, disomba ni uhum somba ni adapt dohot digodang ni Sinamot sipasahatonnami tu hula-hulanami.
Andorang so huhatahon hami, mangido ma hami Rajanami dipanuturion sian hamu dipangidoannami i, ai didok umpasai do: Ranting ni Bulu Duri, sanjongkal dua jari Raja naburju do hamu namalo manuturi jala naburju mangajari. hupasahat hami ma panghataion tu hamu Rajanami, botima.
(huhut dijou Boruna laho pasahathon Microphone)



Hata sian Hula-Hula ni Paranak, hata sian Boru dohot Dongan Tubuna
Ndang pola berbeda i sian hata ni Hula-Hula, Boru dohot Dongan Tubu ni Parboru.

Dung dapot Paranak alus, didok ma:
PARANAK
Rajanami, Hula-Hulanami nunga dibege hamu panghataionnami, nasatahi do hami namardongan tubu, borunami tarlobi hula-hulanami, dipangidoannami asa sahali manombahon hami di godang ni Sinamot sipasahatonnami.
Antong Rajanami, mangoloi pangidoanmunai asa dohononnami ma Somba ni Uhum, Somba ni Asdat dohot Hata ni Sinamot, songon on ma pangidoannami Rajanami: di godang ni Sinamot, disi ma Horbona, disi ma Lombuna, Hodana, Masna, dohot Serena, alai pangidoannami, hupasada hami ma i gabe Rupiah ni Pamarentanta asa unang pola lola hamu Rajanami. Ia Sinamot nagok sipasahatonnami: Sitombol ma Rajanami, Alap Jual ma Parumaennami, jala Ulaon Sadari. jala godang ni Sinamot i Rajanami sombahononnami ma Rp. 30.000.000,==

PARBORU
Mauliate ma Raja ni Boru, Rp. 30.000.000,== ma hape sinamot sipasahatonmu, sitombol, Alap Jual dohot Ulaon sadari alai nang pe songoni anggo upa ni suhi ni ampang naopati dohot angka nahombar tusi pasahatonmu do ate Amangboru.

PARANAK: Baris-baris ni Gajah dirura pangaloan molo marsuru Raja dae ma sooloan ba songon dia pandok ni Rajai huoloi hami ma i Rajanami.

PARBORU
Songoni ma dihita saluhutna napunguon, tarlobi dihamu Hula-Hulanami dielek-elek ni Pamoruonnami dihata ni Sinamot nunga rap umbege hita, godangna i ma Rp.30.Juta sitombol, Alap Jual, Ulaon Sadari tamba ni Parjambaran tu Suhi ni Ampang na Opat.
Laos dipasahat hatana tu Suhut Sihabolonan: di hamu Suhut Sihabolonannami, didok natua-tua do Lasiak natata didia panggilingan, manghatai pe Raja hata tu Raja hata, dihamu Suhut Sihabolonan do anggo keputusan. Nunga dipaboa pamoruonta pangidoan nasida di somba ni uhum, somba ni adat dohot godang ni Sinamot ni Borunta sipasahaton nasida godangna Rp. 30.000.000,== Sitombol, Alap Jual, Ulaon Sadari. Hupasahat hami ma tu hamu.

Hata Alus sian Suhut sihabolonan/Paidua ni Suhut:
Horas ma jala gabe, dihamu Hahadoli/Anggidoli – dangkana do rantingna songon dia hata ni hahana songoni do hata ni angina,. Mauliate ma dihamu saluhutna , sada do hita songon daion mual, sisada Anak sisada Boru, songon dia pe naung dihatai hamu dohot pamoruonta, molo dung denggan dirohamu nadohot do hami marlas niroha disi, Mauliate ma dihamu.

PARBORU
Dihamu Raja ni Pamoruonnami, nunga be sisada hata sisada pandohan hami Hula-Hulamuna: sai songon nidok ni umpasa ma dohononnami: Amporik mallipik, Onggang marbabang, sai gabe ma parsinamot naotik, gabe ma parsinamot nagodang. Dipangidoanmuna asa sombahononmu ma godang ni Sinamot sipasahatonmu tu hami Hula-Hulamuna godangna Rp. 30.000.000,== sitombol, Alap Jual, Ulaon Sadari tambani Upa ni Suhi ni Ampang na-opat huoloi hami ma i, Horas ma jala Gabe, ro ma hamu pasahat hamu ma.

PARANAK
Horas ma jala Gabe Rajanami, Mauliate ma dipangoloionmuna dielek-eleknami.
Laos digora ma Suhut Paranak huhut mandok songon on:: di hamu Suhut Sihabolonan, nunga tangkas dioloi Hula-Hulanta pangidoanta di godang ni Sinamot sipasahatonta, ro ma hamu laho pasahathon Sinamot Nagok tu Hula-Hulanta..

Borhat ma Suhut Sihabolonan Paranak : Inang ni Pangoli ma maniop Pinggan marisi boras dohot Hepeng Sinamot i, diatas telapak tangan huhut ditortorhon.
Parjolo dipasahat ma jolo tu jolo ni Parsinabung Paranak jala sian i tu jolo ni Parsinabung Parboru, dungi borhat ma nasida tu Suhut Sihabolonan Parboru naung rap jongjong di Podium. Detortorhon ma mamungka sian partopi ni na jongjongi jala parpudi sahat ma tu Inang ni Boru Muli naung paradehon Ulosna manjalo Sinamot i. Diusehon Inang ni Paqngoli ma Sinamot dohot borasi, tu bagasan Ulos i dungi masijalangan.
Hatorangan ni si Jalo Sinamot dohot Jambar Hepeng (Upa)
Suhut sihabolonan Parboru = Sijalo Sinamot sian Suhut Paranak

Borhat ma pasahat Panandaion:
Pamarai ni Paranak = Sijalo Upa Sijalo Bara sian Dongan saama ni Parboru
Anak Manjae di Paranak = Sijalo Upa Simandokhon /Iboto ni Boru Muli
(dipasahat Suhut Paranak nidonganan ni Suhut Parboru) = Upa Tulang
Hula-Hula pangalapan Boru (Tulang ni Boru Muli)
Sihunt Ampang ni Paranak = Sijalo Pariban (Haha ni Boru muli naung hot ripe manang Namboru ni Boru muli)
SUHI NI AMPANG NAOPAT di Parboru ima: Sijalo Bara – Simandokhon –
Pariban dohot Tulang
AMPANG ima Suhut Sihabolonan Parboru namanjalo Sinamoti sian Paranak
Pomparan ni Ama ni Suhut marhaha maranggi = Sijalo Upa Todoan
Pomparan ni Ompung Marhaha marangg = Sijalo Upa Panghaei
Pomparan ni Amang mangulahi Marhaha maranggi = Sijalo Upa Bola Tambirik
Iboto ni Suhut = Sijalo Upa Parorot
Punguan ni Marga = Sijalo Upa Punguan
Pinggan Panganan = tu Parboru upa ni natorop

(dung sahat Pinggan Panganan sian Paranak tu Parboru,
asa dihatai Tintin Marangkup)

Tulang ni Hela = Sijalo Upa Tintin Marangkup (napasahathon
Suhut Parboru nidonganan ni Suhut Paranak)

Hata ni Suhut Parboru: Dihamu Dongan Sahundulannami, Tulang ni Helanami
Songon nidok ni umpasa: Hot do jabui, hot margulang-gulang, tung boru ni ise pe dialap bereniba, tong do i boru ni Tulang. Tingkion, Borunami ma jolo dialap beremu, Godang do hujalo hami sinamot ni borunta i, dison otik godang sian sinamot i pasahatonnami sipalas rohamu dohot pangidoannami tung borunami pe dialap beremi ba sisada boru ma hita di borunta i. Mauliatema
Catatan: dinadeba rap pasahathon do tu Tulang ni Hela: Jambar Juhut dohot
Upa Tintin Marangkup.
Molo songoni caran: parjolo ma dihatahon Jambar Juhut i.

Taringot tu Pinggan Panganan dohot Ulos Tinonun Sadari, nunga ditontuhon hian, masinangkohi tangga ni balatukna, lapatanna: masi-isi di horongna be.

PARBORU:
Amangboru, nunga mansai las rohanami dipangoloionmu tu pangidoannami, dohononnami ma: Timbo Dolok Martimbang, panatapan tu Pangaloan. Sai Asi ma roha ni Amanta Debata na di Banua Ginjang, sai ditambai ma dihamu singkat ni i, marlipat ganda angka pansamotan.
Angkup ni i Amangboru, asa dos nangkokna dohot tuatna, atik adong sihol ni rohamu sipangidoonmu sian hami hula-hulamu, rade do hami patupahonsa ontak ni natarpatupa hami, didok Amangboru ma:

Sahat ma panghataion tu namangido Ulos Herbang.
Biasana ma tontu godangna, jala ndang pola ganjang be panghataion taringot tusi, migor ma didok Parboru asa mangarade nasida:

Pardalan ni napasahathon Ulos herbang :

01. Ulos Pansamaot : tu Natoras ni Pangoli
dipasahat Natoras ni Boru Muli.
02. Ulos dohot Mandar Hela : tu Penganten dipasahat Natoras ni Boru Muli.
03. Ulos tu Pamarai : dipasahat si Jalo Bara
04. Ulos tu si Hunti Ampang : dipasahat si Mandokhon
05. Ulos tu Anak Manjae : dipasahat namartinodohon

SUHI NI AMPANG NA OPAT DI PARANAK ima:
1. Pansamot, 2. Pamarai, 3. si Hunti Ampang 4. Anak Manjae.
AMPANG : ima Pangoli

Selanjutna: Parsinabung ma mangatur napasahathon Ulos Herbang tu Paranak.
Sude napasahathon Ulos Herbang sian Parboru tu Paranak ima angka
Dongan Tubu ni Parboru.
Pasahat Ulos tinonun sadari : songon cara ni napasahathon Pinggan Panganan.
Mandok hata Hasuhuton Parboru
Mangampu Hasuhuton Paranak dohot Penganten
Olop-Olop
Ulaon Sadari : Marune – Paulak Une (laos manjalo Parumaen)
Boanon ni Paranak : Namargoar dohot saotik indahan
Boanon ni Parboru : Rap dohot Boru Muli, Dengke simudur-udur, lampet d.n.a.
Jaloon ni Parboru: Upa Panaruhon tu Ina dohot Pasituak na tonggi tu Ama.
Panutup : Marende – Martangiang sian Parboru. HORAS JALA GABE

Jumat, 19 September 2008

BATARA GURU DO SUMIHATHON ADAT

Ruhut-ruhut ni Adat di Pardongan Saripeon on, sangaja do pinatupa dibagasan Hata Batak ala Adat di Halak Batak do nanaeng sitaringotan ditonga-tonga ni Pomparan ni Ompunta si RAJA HUTAGALUNG na maringanan di huta pangarantoan, asa boi dihangoluhon jala diulahon angka dongan ditingkina be, jala asa sude hita nian, boi mangulahon Ulaon Adat namasa di tongatonga ni Pomparan ni si Raja Hutagalung dohot Boruna.

Jotjot do disada ulaon sai pinatujolo angka natumua laho manghatai (parhata) alai jotjot do i ndang olo ala ni hahuranganna diparbinotoan taringot tu Adat i ala ndang diparngoluhon Adat Batak i sian mulai dung hot ripe ibana, manang berlatar belakang ma na so diboto be marhata Batak gabe ndang diantusi nabinegena diangka panghataion Adat.

Jadi adong do namandok: naumboto mandok Amang, Inang, naeng ma nian diboto mangulahon Adat Batak diangka tingki halehetanna.

Aha do Adat: Hata Adat i ma namarharoan sian hata Arab namandok “Adat” i ma namarlapatan:: pangalaho manang paraturan nahinasomalhon, manang Adat Istiadat :i ma parpunguan ni angka paraturan dohot sada patokan diparngoluon jala na berlaku ditonga ni masyarakat, manang suku bangsa.

Ia Adat Batak natatean do i sian angka Ompunta Sijolo-jolo Tubu,, nadimemehon tu angka pomparanna jala songoni ma turun temurun sahat tu hita on nuaeng. Ompunta Sijolo-Jolo Tubui mandok: Mulajadi Nabolon do sumihathon Adat Batak i jala di Buku Adat nahuterbithon hami dohot Amanta Guru W.Hutagalung di taon 1963 tangkas do di si nirongkom dohot surat Batak jala panjahana songon on:

BATARA GURU DO SUMIHATHON ADAT TARINGOT TU
RUHUT-RUHUT NI PARDONGAN SARIPEON DI HALAK BATAK

Adat do Ugari, Sinihathon ni Mulajadi
Siradotan manipat ari, Salaon di siulubalang ari

Jadi sian i dapot do idaon hadomuan manang asal ni Adat Batak ima namarharoan sian Ugamo Sihabatahon ditingki i jala dihaporseai angka Ompuntai do molo denggan jala tangkas niradotan Adat i dapot ma hangoluan, hagabeon, hamoraon dohot hasangapon, jala molo ni langgar Adat ro ma angka nadangol masa ma na so masa: manoro Babiat tu huta; ro logo ni ari; bencana alam; sahit ngenge; siapor dohot antingano; lan hadangolon naasing.

Tung mansai radot situtu do angka Ompunta naparjoloi di Adat i dapot do i idaonta dipandohan nadua :
1. JONGJONG ADAT SITONGKA DO I TABAON
PEAK PE ADAT SITONGKA DO I LANGKAAN
2. ADAT NA SO JADI MOSE, UHUM NA SO JADI MUBA.

Molo tapadomu pangulahonna tu haporseaonta naung mar Tuhan hita, gabe taulahon Adat i mardongan tangiang tu Tuhanta Parasi Roha Boloni. Sada sinta-sinta ni roha di hami di namanurathon Buku Adat on ima asa asa:
TA KRISTENHON ULAON ADAT I.
UNANG MA SABALIKNA
GABE TA-ADATHON ULAON HAKRISTENON I.

Jala unang ma nian dipadomu Ulaon di Adat di Ulaon Hakristenon, unang gabe :“Kultur-Kristentums”.
Unang be nian marsihohot hita tu pandohan ni Ompunta Sijolo-jolo Tubu i di Adat na berpedoman tu Ugamo si Habatahoni, alai tabahen ma berpedoman tu Ugamo Hakristenon..

Di taon 1824 marpungu do halak Batak di Rura Silindung lobi sian 2000 halak na ni rajaan ni sahalak Raja Nasangap, laho mangadopi haroro ni Pandita Burton dohot Ward ima nalaho pasahathon Barita Nauli nabinoan nasida tu Bangso Batak.

Dung disosohon Pandita na dua halak on asa olo nasida manjalo Barita Naulii, beha ma alus dapot nasida sian angka Ompunta i: songon on ma alusna:
“Ndang olo hami manadinghon Adatnami naung songoni lelengna huhangoluhon hami, ndang adong naboi sipaubaon di Adatnami i” alai: anggo boi patuduhononmu (manang songon hata nuaeng mandok buktihononmu) dalan tu Hamoraon, Hagabeon dohot Hasangapon, las ma rohanami manjanghon hamu.

Sian alus i tarida ma naporsea situtu do Halak Batak molo diradoti dohot denggan Adatna i dapotsa ma hamoraon, hasangapon dohot hagabeon, alai molo dilaosi Adat i ro ma angka nasuhar.. Porsea do angka Ompunta na parjolo i: Molo burju iba marugamo huhut burju mangulahon songon pinangido ni Adat Batak i, dapot nasida ma sinta-sinta ni roha nasida: Hamoraon, Hagabeon dohot Hasangapon.

Songoni ma nian hita Halak Batak naung mananda Jesus Kristus Sipalua I, asa tahaburjuhon mangoloi pangidoan ni Tuhanta di ngolunta be, jala marhite haporseaontai ma hita nang dinamangulahon Adat Batak i.

Molo niparate-atehon tutu angka paraturan dohot hasomalan nahinangoluhon ni Adat Batak dapot do idaon godang ni paraturan na so boi laosan:ndang dihalomohon Adat. namangalangkup; namanangko; namamunu manang namartodos; namangaleai natoras/ingkon sipasangapon do natua-tua; dohot lan naasing i, i ma angka pangalaho na so tinolopan ni Adat, songoni nang hapantangan angka na so boi olion pe tangkas do dipatorang di Adat i, jala molo pinadomu-domu, godang do na diorai di bagasan Patik na Sampului na tong do diorai di Adat Batak.
Boi do jahaonta di Padan na Imbaru na: sinurat ni Apostel Paulus di Surat Rom 2: ayat 14: Ai diulahon angka Sipelebegu sian dirina do na pinangido ni Patik i, atik pe soadong Patik di nasida, asa gabe nasida sandiri ma songon patik di nasida na so marpatik hian.
Beha ma nian dengga nna molo ta-Kristenhon Adat Batak i diangka parulaonna dohot dipandohanna, asa sai ingot mamboanhon Goar ni Tuhanta Jesus namangolui. Unang ma gabe sabalikna na terjadi: gabe mangadathon Ulaon ha-Kristenon.

Songoni ma umbahen na niulahon manurathon di Buku on, angka panghataion dohot sipatupaon di angka Ulaon Adat, marsaor hata hakristenon, jala marhite Buku nametmet on ma pangidoan tu angka Dongan Tubu na di Jakarta, Bogor, Bekasi, Depok, Tangerang dohot nahumaliangna, asa olo mangalehon rohana dohot tingkina manjaha Buku on, asa adong Bohal di nasida dinamandohoti Ulaon Adat, jala gabe ro rohana huhut paihut-ihut ulaon di paradaton namasa ditonga-tonga ni keluarga Pomparan ni si Raja Hutagalung, ndang be gabe holan panangi-nangi. Ai kebosanan do na ro molo so niantusan nabinege.

I do umbahen na sai sering binege pandohan namandok:
1. Tidak ada gunanya Adat,
2. Adat Batak marteletele banyak menyita waktu Ala ndang diantusi ibana “AHA DO LAPATAN NI ADAT I”

Apala naumporlu : Andorang so sahat hita tu pangulaon di Adat Batak, parjolo sahali ingkon ma jolo taantusi taringot tu angka partuturon di Halak Batak, jala mardomu tusi sangajo do husurathon di Buku on PARTUTURAN na marhata Indonesia, patoranghon hubungan ni istilah dohot pandohan di Partuturon i. asa mangantusi mamangke pandohan ni Partuturan i., di angka anakhon na so mangantusi Hata Batak, minimal anakhon i boi mandok partuturanna.
.
Pangidoanhu songon panurat ni Buku nametmet on, molo tung adong nahurang-lobi di nasinurathon taringot tu Adat Batak on pos do rohaniba dipangurupion ni angka dongan asa olo nian padengganhon asa lam tu tingkosna ulahononta Ulaon Adat i.

Antong, arop situtu do rohangku sian parbinotoanhu nasaotik taringot tu Adat Batak naung husurathon on, boi nian marguna laho manamba hagirgiron ni angka Dongan Tubu Pomparan ni si Raja Hutagalung laho mangaradoti Adat Batak i songoni ma nang mar-Hata Batak pe. Tangan do botohon, ujungna jari-jari, jari-jari sampulu sude do i mampanggoari, molo adong nahurang lobi panuraton di panghataion di buku on, parjolo ma hami marsantabi., manang di hata Indonesia: kami terlebih dahulu memohon ma’af.

Horas ma dihamu,
Panurat
St. D.P.Hutagalung (O.ni si Salomo)
Jalan Musyawarah 3 No.5 Srengseng
Kembangan, Jakarta Barat 11630.