PESTA UNJUK TARUHON JUAL

1. PARBORU :
a. Ro ma Parboru dohot sude horong Hula-Hula dohot Tulang, tu huta ni Paranak., sadari andorang so mata ni ulaon i.
b. Paranak ma paradehon inganan parbornginan di Parboru, dohot haporluan siapari.
c. Ndang adong be Ulaon Sibuha-buhai, alai manogoti ditaruhon Paranak ma Sipanganon tu inganan parbornginan ni Parboru Sipanganon na jagar, laos dihatahon ma sipanganoni tu Pihak parboru songon Daon Pogu. (Sarapan Pagi)
d. Dung sahat ro di tingkina laho borhat tu Gareja, ro ma rombongan ni Suhut Paranak dohot Pangoli tu inganan parbornginan ni Suhut Parboru, jala Suhut Parboru dohot Boru Muli nunga mangarade hian. Dung martangiang, rap borhat ma nasida mangudurhon Pangoli dohot Boru Muli tu Gareja.

2. PELAKSANAAN NI ULAON UNJUK DUNG MULAK SIAN GAREJA:

a. Suhut Paranak rap dohot Penganten nunga masuk nasida tu inganan parpestaan.
b. Suhut Parboru dohot sude horong nasida ndang masuk dope tu inganan parpestaan jala diruar ni gedungi dope nasida paima ro panggora ni Protokol ni Paranak.
c. Sude ulaon Protokol diulahon Paranak: manggora naginokkonna asa masuk. Dungi jaloon ni Suhut Paranak ma horong ni : Hula-Hula dohot Tulang nasida.
d. Dung masuk sude horong Hula-Hula ni Paranak, mangarade ma nasida nasapanganan dohot namarsabutuha, laho manjangkon haroro ni Suhut Parboru dohot sude rombonganna.
e. Nunga mangarade Suhut Parboru: manghunti tandok nabolon, dohot Dengke Simudur-udur laho sipasahaton nasida tu Suhut Paranak.
f. Protokol Paranak : Dihamu nahuparsangapi hami Raja ni Hula-hulanami Raja………songoni nang dihamu nahuparsangapi hami horong ni Hula-Hula dohot Tulang ni Raja ni Hula-Hulanami dohot Amanta Raja dohot Inanta Soripada uduran ni Raja ni Hula-Hulanami:Rajanami, nunga mangarade hami manjanghon haroromuna tubagasan gedung on, masuk ma hamu Rajanami. Dijolo ma Hasuhuton Bolon manghunti Tandok nabolon, Suhut Paidua, Dengke Simudur-udur, rombongan ni Parboru, jala dipudi nasida ihut ma Horong ni Hula-Hula dohot Tulang ni Parboru, masiboan tandona be dohot Dengke Siuk.
g. Dinamasuk rombongan ni Parboru, manghuling ma Ogung, manortor ma sude Horong ni Suhut Paranak laho manjanghon haroro ni rombongan ni Hula-Hulana i.
h. Sude si Pir ni Tondi dohot Dengke nabinoan ni rombongan ni Parboru, sahat jaloon ni Parank do i, (alai anggo Dengke Simudur-udur laho sipasahaton ni Suhut Parboru tu Suhut Paranak, dipasoding ma jolo paima tingki pasahathon).
i. Protokol Paranak : Horas ma dihamu Raja ni Hula-Hulanami, nunga huparade hami
hundulan di hamu Rajanami di sabola siamunnami, hundul ma hamu Rajanami.

3. CARA NI ULAON TARUHON JUAL DI JAKARTA:

a. Parjolo ma digora asa masuk Penganten dohot Suhut Paranak songoni nang uduranna, jala didongani Suhut Sihabolonan Parboru.
b. Dung sahat Penganten tu Podium, mulak ma muse Suhut Sihabolonan Parboru mandapothon uduranna tu ruar Gedung, paima ro panggora ni Paranak.
c. Digora Protokol ni Paranak ma asa masuk Suhut Parboru dohot uduranna. Sude tata cara dohot hatana songon panggora natarsurat diginjang i.
d. Protokol Paranak : manggora asa masuk Hula-Hula dohot Tulang.
e. Dung masuk sude Hula-Hula dohot Tulang ni Paranak dipasahat ma acara tu Protokol ni Parboru.
f. Protokol Parboru : manggora asa masuk horong Hula-Hula dohot Tulang. Siala dos ni tahi ni Paranak dohot Parboru, sude nabinoan ni Hula-Hula ni Parboru, Parboru do manjalo, alai dung laho sidung ulaon i, dibagi Parboru ma si Pir ni Tondi nabinoan ni Hula-Hulanai tu Paranak.
g. Ala di Alaman ni Paranak do Ulaon Unjuk, gabe Paranak do mambagi Parjambaran tu Parboru, jala Ulak ni tandok ni Parboru dipasahat ma Ihur-Ihur ni Tudu-tuduni Sipanganoni. Sidapot Solup ma anggo Parboru.
h. Parbagi ni Parjambaran Juhut di Parboru disesuaihon ma tu kondisi ni nanijalona. Boi ma dibagihon gabe parjambaran sian ihur-ihur i.