01. Na ro do Rombongan ni Parboru rap dohot sude Sisolhotna dohot Boru Muli tu huta ni Paranak.Asa mulak tu dasar ni ADAT Ulaon Taruhon Jual ni-usulhon do songon on pelaksanaanna:
Molo tar dao do Huta ni Parboru tu Huta ni Paranak, paradeon ni Paranak ma Jabu parbornginan di nasida. Molo adong do Jabu ni Dongan Sabutuha ni Parboru di hutai, tarjumolo doi dihubungi Parboru asa adong inganan haborhatan nasida di hutai.
02. Di-mata ni ulaoni, manogotnai migor do ditaruhon Paranak Sipanganon tu inganan parbornginan ni Parborui Sipanganon marlompan Juhut ima nadigoari Daon Pogu manang hata nuaeng: Sarapan Pagi. Ndang pola rombongan laho manaruhon sipanganoni, sae ma sahalak sian Dongan Sabutuha ni Paranaki nabertugas pasahathon hata ni sipanganoni tu Parboru, anggo namamboan sipanganoni angka Boru ni Paranak ma.
03. Dung sahat di tingkina laho borhat tu Gareja (ulaon Pamasu-masuon) ro ma rombongan ni Paranak rap dohot Anak Mangoli tu bagas Parbornginan ni Parboru jala ma rade Parboru dohot Boru Muli manjalo haroro ni Paranaki. Songon ulaon namarsibuha-buhai alai ndang manghunti Ampang be. Martangiang ma Parboru, tangiang laho borhat tu Gareja jala rap udur ma Paranak dohot Parboru mangundurhon Penganteni.
04. Tangkas do taantusi ia Adat Pamuli Boru Taruhon Jual manang didok doi RAMBU PINUDUN, namarlapatan doi sude: Inganan, Sipanganon, dohot sude haporluan ni Pestai gabe tanggung jawab ni Paranak. Ia Parboru holan mamboan Dengke Simudur-udur dohot Ulos Herbang sipasahaton tu Paranaki
05. Di Inganan Parpestaan: Dung mulak sian Gareja, jala sahat tu inganan parpestaani parjolo ma masuk Penganten dohot Rombongan Suhut Paranak alai anggo Suhut Parboru dohot sude rombonganna/naniontangna ndang dohot dope masuk tu bagas. Dung sude simpan parhundul ni Hasuhuton Paranak dohot angka naniontang nasida, parjolo ma Paranak manggora : Hula-Hula, Tulang, Tulang Rorobot, Bona Tulang, Bona ni Ari, Hula-Hula na-Marhaha-maranggi dohot Hula-Hula ni Anak Manjae masuk tu bagas jala jaloon ni Suhut Paranak ma sude Hula-Hulai dohot tortor.
06. Dung simpan masuk jala hundul sude hula-hula ni Paranak, bersiap ma Suhut Paranak laho manjalo haroro ni Rombongan ni Suhut Parboru. Rap masuk ma Suhut Parboru, Hula-Hula, Tulang, Tulang Rorobot, Bona Tulang, Bona ni Ari, Hula-Hula Namarhaha-maranggi, Hula-Hula ni Anak Manjae ni Parboru, ihut ma muse angka sisolhot naniontang ni Parboru masuk tu bagas dung manggora Paranak. Jadi sahali masuk do sude. Sude nabinoan ni Suhut Parboru dohot Rombongani, Dengke Siuk dohot Boras si Pir ni Tondi dipasahat ma tu Paranak alai anggo Dengke sipasahaton ni Suhut Parboru dipasimpan ma jolo diinganan na denggan paima tingki laho pasahathon.
07. Di Jakarta nataulahon di Pesta Adat Pamuli Boru Taruhon Jual gabe songon ulaon Alap Jual do: Adong do namarsibuhabuhai, dungi di Gedung adong Hak ni Parboru manggora Hula-Hulana asa masuk tu Gedung jala Suhut Parboru muse namanjalo sude nabinoan ni Hula-Hulana.
Pertanyaannya : Beha do pandapotmuna angka Dongan: Taulahon ma torus sisongoni manang taihuthon ma songon dia aslina......??????????
3 komentar:
Syalom.....Horas....
Salam kenal, ahu Tugo Tambunan tinggal di Medan, mansai sonang do rohangkon manjaha blog mu na on, songon buku parsiajaran tu ulaon adat, alai singkat, padat lam jelas. Adong do buku parsiajaran tu ulaon adat amangku najolo, alai paborat hu manjaha i, mungkin alani buku lama dang boi mangihut di tata bahasa na gampang dimengerti sao nari. Jadi naeng mandok mauliate ma ahu tu hamu amang, ala boi dilehon hamu tingki mambaen blog na mansai denggan tu hami angka naposo on, Mauliate ma. Jadi taringot tu masalah adat na hilang alani kebiasaan2 manang persoalan kepraktisan na somal terjadi di kota2 besar, khususnya masalah ulaon taruhon jual di perkawinan adat batak, alani nga hea hu ihuthon acara si singoni di tingki perkawinan ito ku di Aek Kanopan tu marga Simarmata, persis do ulaon i songon na di baen di blog on. Jadi, molo terlalu gampang hita bertoleransi menghilangkan/mengganti tata cara na somal dengan alasan kepraktisan manang alasan2 na asing, boi do i gabe menghilangkan total manang merubah total ulaon i di masa yg akan datang. Setiap adat manang tata cara budaya adong do maksud i, adong do filter Agama di hita, jadi molo dang sejalan di ha Kristenan boi do adat i diganti manang dihapus, alai i pe ingkon hati2 do iba memilah2i asa unang gabe mago sude adat istiadat di halak batak on. Jadi molo alasan macet manang dao huta parboru tu paranak dan sebaliknya, songon na terjadi di jakarta, boi ma dilului cara2 na asing alai denggan jala dang menghapus manang mengganti maksud dasar di ulaon i. Tarlumobi di hami naposo on, natua2 do panutan nami di paradatan, jadi molo nga hilang manang marganti adat di masa sekarang, be ha ma di masa mendatang di tingki hami naeng pamulihon boru manang pangolihon anak manang di angka ulaon adat na asing. Botima, Horas jala gabe.
Shalom,
Horas ma di hita sude,
Parjolo ma hupatandahon dirikku, Au margoar Tiler Bongitan Simanjuntak tinggal di Jawa Barat. Mansai tertarik situtu do au manjaha penjelasan dohot akka hatorangan ni Amang Penulis/Panurat on.
Manang piga piga hali au manukkun tu akka Penulis na asing, dang adong dope na bersedia mambahen alus/jawaban.
Molo ulaon Taruhon Jual manang Rambu Pinudun (Bolahan Amak Paranak), kebetulan molo di Parserahan on nungga massai jarang dipatupa ulaon Marsibuha-buhai, hape nian molo ni lapatan do ulaon Marsibuha-buhai i, boi dohonon GOAR NA MA DAINA (Mambuhai Ulaon ma na huantusi) Alai alani akka malo dohot efisiensi ninna akka na deba gabe jarang ma dipatupa ulaon sibuha-buhai.
Hape andorang so masuk tu acara pamasu-masuon, sai jumolo do dipatupa marsipanganon manogot manang gabe didok mai sarapan pagi.
Sebelum marsipanganon tar biasa ma nibereng borhat ma pengantin baoa/laki-laki tu bagas ni pengantin borua/perempuan lao mangalap si boru jala laos sian ima diboan borua on tu gereja inganan tarpasu-pasu.
Sipata ni ida pengantin baoa/laki-laki i didampingi sahalak natua-tua ditikki mangalap tu bagas ni pengantin borua/perempuan.
Sukkun-sukkun hu : SONGON DIA MA/AHAMA HATA SIDOHONON NI NATUA2 NA MENDAMPINGI PENGANTIN BAOA I DITIKKI RO MANGALAP PENGANTIN BORUA I?
Mohon maaf molo adong na hurang di sukkun-sukkun hu diginjang.
Sungkun sungkun Nami Amang,
Tingki Sadi harido ditaruhon parboru boruna tu joloni paranak hombar tu goarni laoni ulaoni ulaon TARUHONNJUAL,ai dung simpul Sian gareja pintor tu joloni paranakdo anak dohot parumaenna.
Hape molo ulaon dialap jual dung simpul Sian gareja dijoloni parborudo Boru dohot helana,dung simpul pe dijalo haduhuton parboru uduran ni hula hula na sude ipe asa dialap paranak parumaenna dohot anak na Sian joloni parboru mardongan Ringgit Sitio soara,Sian tangkasdo Tarida goarni ulaoni ulaon dialap jual
Hape molo diulaon TARUHONNJUAL Ndang ditaruhon parboru boruna tu joloni paranak,hoalan alani ni dijoloni paranakdo bolahan Amak Gabe didok taruhon jual
Uang praktekna sarupa tu NANIALAP jualdo
Mar sibuha buhai di jabuni parboru
Borhat Lao tu gareja tong do Sian jabuni parboru
Molo taruhon jual borhat Sian jabuni paranakma nian
Hombar tu goarni ulaoni ulaon taruhon jual
Songonima jo komentar Sian hami
Posting Komentar